Clemens episcopus servus servorum dei venerabilibus fratribus, archiepiscopis et episcopis, ac dilectis filiis, electis abbatibus prio ribus decanis prepositis archidiaconis archipresbyteris plebanis et aliis ecclesiarum prelatis ac ecclesiasticis personis‚ religiosis et aliis, earumque capitulis et conventibus exemptis et non exemptis Cisterciensis, Cluniacensis‚ Premonstracensis‚^a sancti Benedicti‚ sancti Augustini et aliorum ordinum, nec non magistris et preceptoribus domorum militie templi, hospitalis sancti Iohannis Ierosolimitani et sancte Marie Theutunicorum ad quos littere iste pervenerint salutem et apostolicam benedictionem. Cum felicis recordacionis Urbanus papa quartus predecessor^b noster de fide ac discretione dilecti filii magistri Raynaldi canonici Theracinensis^c confisus, ipsum ad partes Ungarice, Boemiensis, Poloniensis, Moravice, Sclavonice et Salzburgensis provincie pro quibusdam ecclesie Romane negociis destinaret, nos volentes quod idem magister in eisdem partibus commissa sibi ecclesie predicte ab eodem predecessore negotia finaliter prosequatur‚ universitatem vestram rogamus et monemus attente per apostolica vobis scripta precipiendo mandantes, quatenus predictum magistrum predicta negocia prosequentem cum quatuor equitaturis et sex vel septem personis familiaribus suis, cum per vos vel loca vestra transitum fecerit, pro nostra et apostolice sedis reverencia benigne^d recipientes et honeste tractantes eundem, ei de necessariis suis vel pro eis, si idem loci aut temporis qualitate suadente maluerit, in duobus ferconibus^e et dimidio boni argenti vel valoris^f quolibet die nec non de securo conductu in eundo morando et etiam redeundo honeste ac liberaliter providere curetis. Si autem eundem magistrum oportuerit in quovis loco moram facere longiorem, ne loci illius ecclesie pro ipsius et suorum neccessariis plus congruo aggraventur providere cum ab ipso fuerint requisite, itaque uniuscuiusque diei procuratio summam predictam et procuracionum numerus sive in victualibus sive in pecunia numerum dierum quibus moram aut iter fecerint non excedant. Et ne ipse ultra vel preter quocumque pretextu vel modo quicquam in pecunia vel vestibus seu rebus quibuslibet exigat aut recipiat a quocunque, aut sibi vel alicui familiarium eius seu alii pro ipso vel pro eis aut eorum quocunque quicquam detur ab aliquo, aut etiam sub specie cuiusque muneris offeratur, districtius inhibemus, nisi forsan contingeret^g aliquem de predicto equitaturarum eius numero aliquo casu deficere vel inpedimento teneri et tunc in huius modi necessitate sibi teneantur^h qui ab ipso requisiti fuerint de supplemento congruo eiusdem numeri sine difficultate qualibet subvenire, ac ipse magister subvenientiⁱ taliter suas inpendat patentes litteras, per quas appareat eum equitaturam huiusmodi recepisse; alias autem qui requisitus fuerit dare sibi equitaturam huiusmodi nullatenus teneatur. Preceptum nostrum taliter impleturi quod, cum idem magister ad nos redierit, de vobis grata nobis refferre valeat et accepta et nos devocionem vestram possimus exinde merito commendare. Alioquin sententiam quam ipse tulerit in rebelles ratam habebimus et faciemus auctore domino usque ad satisfactionem condignam inviolabiliter observari, non obstantibus^j si est aliquibus ab apostolica sede indultum, quod legatis vel nunciis sedis ipsius aliquam procuracionem exhibere vel in ipsa contribuere minime teneantur, seu quod interdici suspendi^k vel excommunicari non possint per litteras apostolicas que de indulto huiusmodi et toto tenore ipsius seu de verbo ad verbum plenam et expressam non fecerint mencionem, seu aliquibus privilegiis vel indulgenciis quibuscunque personis locis vel ordinibus sub quavis forma verborum ab apostolica sede concessis, de quibus et quorum totis tenoribus plenam et expressam oporteat in nostris litteris mencionem fieri et per que id quomodolibet valeat impediri. Data^l Perusii nonis martii, pontificatus nostri anno primo.

Source Fulltext: LAMPEL, Urkunden Sanct Pölten (=FRA I, Wien 1981) S. 99-100