Wir Chunrat von gotes gnaden erzbischolf ze Salzburch und legat des stu^ols ze Rome verjehen und tu^on chunt allen den di disen brief sehent oder hoernt lesen, daz wir daz gu^ot dar umbe der probst von Hertzogenburch ansprach gên uns het, ez si an der wise di Proebstinne, die^a Wolfram inne hat, mit dem gu^ot daz dar zu^o gehoert, oder an der wise di da haizzet Swellerinne, mit dem daz dar zu^o gehoert, oder and^b der wise di da haizzet Chamerwise und daz dar zu^o gehoert, oder an anderm gu^ot, Ulrichen unserm probst ze Mower¹ verlihen haben umb zwai und fuemzich phunt wienner phenninge‚ also daz daz selbe gu^ot unser urborleut mit im suln haben. Wolden aber si ez niht mit im^c haben, so belibet ez dem vorgenantem Ulrichen und siner housfrowen Ofmeien und sinen erben ouf den alten dienst den man ê da von hat^d gedient. Moeht aber der vorgenant Ulrich aine des gu^otes niht gewern, so erlouben wir im, daz er daz vorgenant aigen ze ainzigen gelazzen mueg unsern urborleuten mit den alten rehten und dienst. Doch behalt wir uns besunderlich den weingarten an Stalhoverperige und di hofstat di Hainrich Pêr hat. Und sint des geziuge unser lieb bru^oder in got her Engelbreht der abt von Sand Peter ze Salzburch, Seifrid unser Schreiber, Rudolf von Vonsdorf unser vitztum ze Friesach, Ulrich Marchartes suen, Hainrich sin aidem, Prehtel under der louben, Ott der probst von Arnsdorf, Alram der Stiller und ander geziuge. Der brief ist gegeben ze Wienen, do von Christes geburt warn tousent jare zwaihundert jar und in dem dritten und niunzigstem jar, an sand Thomas tag der^e zwelifboten.

Source Fulltext: LAMPEL, Urkunden Sanct Pölten (=FRA I, Wien 1981) S. 182-183