Ich Chunrat Seznagel^a von Chuenenperg tue allen den chunt die disen brif an sehent oder horent lesen, di nu sint oder chunftig werdent‚ daz ich han gegeben ewikleich ze haben herren Ekchart dem erberen brobst und seiner samnung und dem goczhaus dacz Sandt Polten ain lehen und ain hofstat auf der Persnikch pei Chreussenperg mit vogtai mit sambt und mit ganzen recht, daz mein recht aigen was, und han das getan‚^b da^c ich es^d wol getuen macht‚^e mit meiner hausfrawen vrowen^f Chunegunden gueten willen; und selbn guetes wil ich ir gewer und ir scherme sin noch des landes recht. Wand awer^g mein tochter Margred und Dimuet zu iren jaren nicht chomen wären,^h du ich dasⁱ vorgenante guete von mir gab, hat sich Dietreich und Rudolff mein prueder und Dietreich von Swobsek mein geswei und Seifrit und Chunrat mein oehamen daz^k willechlichen an genomen, daz si mein tochter di vor genanten dar zu pringen schullen, swan si man gewunen,^l daz si an alle gab und an alle miet von dem vorgenanten guet ledikleichen gesteen. Swaz awer dem vorgenanten gotes haus mue, arbait, chost oder schad auf gestuende von disen sachen, daz schullen si^m haben auf den vorgenanten mein pruder, mein geswein und meinen öhamen. Di selben auch, ob ich nichten wer, want wir alle todleich sein, habent sich das williklichen angenomen, daz si des oft genanten goteshauses und desselbigen guetes an miner stat geweren und schermensein; und swaz innⁿ an ainem abget, daz sullen si auf den andern haben. Und daz dicze dinch ewig stet und unzerbrochen beleib, gib^o ich dem oft genanten goteshaus disen^p offen brive mit minem insigel bestet und ist mein guet wille swi manch insigel ze pezer^q warnunge si an denselben^r prive hohent^s der vor genanten meiner vreunt, oder di hernach ze zeug^t geschriben stent, daz ist: herr Wulvinch von Wald, herr Otte von Wald, awer herr Otte von^u Wald‚^v herr Weikchart von Topel‚ herr Menhart von Reut, herr Gotfrit von Tocenpach,^w Wernhart von dem^x Hewslein, Dietreich von dem Hewslein‚ Wulvinch von dem^y Hewslein‚ Hainreich von Pawmgarten, Gotfrit von Reut, Herchenger von Cherspaumpach, Aigl von Lengenpach‚^z Chunrat von Sumerawe und ander zeug genuech, den das chunt und gewissen ist. Und ist dicze dinch geschen^a* und diser^b* prive gegeben dacz Sandt Polten, do von Christes gepurde was tausent jar zwai hundert jar in dem siben und neunzigistem jar an der zwelifpoten tag sand Philippes and sand Jacobs.

Source Fulltext: LAMPEL, Urkunden Sanct Pölten (=FRA I, Wien 1981) S. 186-187