Wann elle^a dinch zaergâenchleich sind und auch gehueg des menschen und^b der leuet mit dem leib erstirbt, so ist das weishait und sin, daz man der dinch di ewig und staet schuellen beleiben mit geschriben uerchuend erleuchtet ewig und bestaett. Und da von ich Pericht von Wazzerberch, weiln hausvrow hern Irnfrides von Puechperch, tuen chunt und offen allen den, di disen prief hoernt lesen oder sehent, di nu gegenwuertig sind oder her nach chuenftig sind, das ich mit verdachtem willen^c und mit guetem fuersatz mein selbes und meiner chind, meins suens U^elreiches und meines suns Dietreiches gegeben han vreileich und ledichleich und geselt zwai phunt gelts dacz Geroltstorf auf dem maeirhof, das mein und aller meiner vodern vreis und lediges aigen gewesen ist vor aller voitaei und vor allem werltleichem twanchsal und dienst, auf sand Margreten alter und auf sand Margreten chappell der vrown chloster datz Sand Po^elten zu einem ewigen liecht dem selben alter und derselben vorgenanten chappeln, meiner sel zu einem ewigen selgraet und ze trost und ze saelden immer an end. Und mit dem selben recht han ich sew dew vorgenanten zwai phunt geltes der vorgenanten chappeln gegeben vreileich und ledichleich, als ich ez^d besezzen und gehabt han. Und das dise schrift und dise red staet und ewich sei und unverwandelt und unverchert von allen leueten, swi si genant sein, beleib, des versigel ich disen prief und die vorgeschriben red mit meinem insigel und mit meins geswein insigel hern Uelr. von Puechperch¹ meins wierts prueder‚ viczstum^e des pischolfes von Pazzaw und chorherr ze Pazzaw, mit meiner vorgenanten suen insigele U^elreichs und Dietreichs, ² mit der willen und gunst iz geschehen ist, zu einem ewigen uerchuend und bestaetigung der^f vorgeschriben red mit gueten und mit ganzen trewen ainvoltichlaich an alleu irr.^g Und sind des zeug: der erbaer herr pischolf Wernh. von Pazzaw, her Goetfrid techent ze Chrems,³ her Ulr.^h des pischolfs chapplan, her Ott der schreibaer, her Albrecht pharraer ze Chappelln, her Chunr. pharrer ze Pehemchirichen, her Hainr. pharrer von Sand Zen‚ her Ott von Wald, her Seifrid von Loechlein, her Go^etfrid von Toczenpach,ⁱ Hainr.^j der Pielaaer, Peter richtaer dacz Sand Poelten, U^elr.^k des U^oczen^l aidem‚ Engelschalich des gotshaus amman und ander frum leuet und erbaer genuech, di pei der red gewesen sind. Di red ist geschehen dacz Sand Poelten, do von Christi^m gepu^erd ist gewesen tausent jar dreuhundert jar in dem andern jar‚ an dem dritten tag nach sand Lucein tag,⁴ da die chappell geweicht ward.

Source Fulltext: LAMPEL, Urkunden Sanct Pölten (=FRA I, Wien 1981) S. 206-207