Ich Andre und ich Augeustein sein brueder, herrn Chunrats sune des Loner^a dacz Sandt Pölten, dem got genad, und alle unser erben, wir verjehen offenlich an dem prief allen den di in sehent oder hörnt lesen, das der egenant herr Chunrat unser vater mit unserm guetlichem willen geschaft hat den erbern herrn dacz Sand Pölten auf irr oblai ainen zehent dacz Potenprunn, da von im di egenanten herrn und allen unseren vodern^b furbas alle jarr jerlich ainen jartag begen sullen; und denselbn zehent haben wir von den herrn herwider gechauft umb funf phunt phenning wienner munz, also beschaidenlich: di weil wir inn der funf phunt phenning nicht geben, so sull wir in ain halphunt^c phenning alle jarr davon dienen, zwir in dem jar: sechzig phenning an sand Merteins tag und sechzig phenning ze osteren; und ze wellem tag wir in der phenning nicht dienen, wer denn richter ist dacz Sannd Polten, der schol in für dieselben phenning phant antwurten von allen dem gütt das wir haben, mit unserem guetlichen willen, an alleu widered^d und an alle chlag. Das inn die red stet und unzebrochen beleib, darumb so haben wir gebetten den erbern man herrn Petrein den Wurffel zu den zeiten² dacz Sannd Polten, das er sein insigl an den prief gehangen hatt zu ainem warn gezeug diser sache, wand wirr selb nicht insigl haben. Der prief ist geben dacz Sand Polten, nach Christes geburt uber dreuzehenhundert jarr darnach in dem siben und dreissigistem jar, des suntags nach den phingsten.

Source Fulltext: LAMPEL, Urkunden Sanct Pölten (=FRA I, Wien 1981) S. 321-322