Ich Ru^edolf von Liechtenstain und ich Alhait^a sein hausvrow und alle unser erben wir verjehen und tuen chunt allen den di den prief sehent oder horent lesen, di nu lebent und her nach chunftig sint, daz wir mit verdahtem muet mit gesamter hant und mit gueten willen aller unser erben, zu der zeit do wir iz wol getuen mohten, haben ze chaufen geben dem erbern^b herren probst Dyetmaren dacz Sand Polten und dem convent des selben gotshaus auf ir oblai unsers rechten chauf aigens zwai phunt gelts wienner phening, di da ligent datz Stainveld bei Sand Polten auf uber lent æchern umb zwainzich phunt^c phening wiennêr^d munze, der wir recht und redleich gewert sein. Ez schuln auch di egenanten erbern herren probst Dyetmar und der convent mit der vorgenanten gult allen ir frum schaffen wie si wellen mit unserm gueten willen an allen irresal, und wellen auch des ir scherm und gewer sein fuer alle ansprache, als chauf aigens recht ist in dem land ze Osterreich. Nement sev dar uber dehainen schaden^e mit recht an der egenanten gult, den schul wir in ab legen, und schuln daz haben auf allen dem guet daz wir haben in dem land ze Osterreich. Wenn aber si des selben schadens nicht lenger geraten wellent, so schul wir in den ab legen. Tæt wir des nicht, wer denn herzog in Osterreiche ist der schol in unsers guets als vil da fuer in antwurten oder wen er dar zu schafft, da von di erbern^f herren werden gewert ir^g schadens gar und ganz mit unserm guetlichen willen an allev widerred. Daz in di red also stæt und unzebrochen beleib, dar uber so geben wir ich Ru^edolf von Liehtenstain und Alhait^h sein hausvrow disen prief versigeltenⁱ mit unsern baiden insigeln¹ zu einem waren urchund und stæten sicherhait diser sache. Des^j sint gezeug mit ir insigeln: her Dyetreich von Weizzenberch und Dyetreich sein sun und ander erber læut, den disev wandlung wol chunt und gewizzen ist. Der prief ist geben dacz dem Hag, nach Christez geburt uber dreuzehen hundert jar dar nach in dem ainz und vierzkisten jar, des eritags in der lesten vastwochen.

Source Fulltext: LAMPEL, Urkunden Sanct Pölten (=FRA I, Wien 1981) S. 338-339