Ich Gorig, Ainbeich, Chuen, Eberhart, Jans und Nycla wier pruder von dem Hof verjechen offenleich mit disem brief, daz uns unser ochem Wulfinch der Veyrtager gelten scholt vier und fumfzig phunt wienner phenning an dem hof ze Eczlestorf den wier im ze chaufen gegeben haben, dar um wier zwen prief von im um haben, und haben auch di selben prief verlorn.¹ Nu vergechen wier auch, daz er uns der vier und fumfzich phunt phenning, als di zwen prief sagent, und alles des guets, dar um wier im den hof ze Etzlestorf gegeben haben, gar und ganz verricht und gewert sein. Wier loben auch dem vargenanten Wulfing dem Veirtager und sein erben mit unsern trevn an aides stat, ob di selben prief funden werden, daz wier im oder sein erben die wider geben schullen an allen iern schaden. Wer aber daz, daz der vargenant unser ochem Wulfinch der Veyrtager oder sein erben dehain schaden nemen von juden oder von christen von den selben zwain priefen, den schulle wier im und sein erben ab legen an allez gever; und wan er oder sein erben den schaden nicht lenger leiden wellent, welichen sev dan under uns vodernt, der schol in laisten selb ander mit zwain pherften hinz Wienn in ein erber gasthaus, wo uns der vargenant Wulfinch der Veyrtager oder sein erben hin zaigent, und schullen da inne ligen als inne ligens und laistens recht ist, und nicht auz chomen, unzn daz seu pede haubtguet und schaden gar und ganz verricht und gewert werden. Und daz dise sache und dise red stet und unzebrochen beleib, und wand ich vargenanter Eberhart, Jans und Nycla nicht aigener insigel haben, so verpind wier uns diser sache stet ze haben und geben disen prief mit sant unsern prudern versigelt mit unser pruder insigel Gorgen,² Aynbeigs³ und Chuen.⁴ Der prief ist geben nach Christes geburd dreuzechen hundert jar dar nach in dem siben und vierzigistem jar, an sand Gallen^a tag.

Source Fulltext: LAMPEL, Urkunden Sanct Pölten (=FRA I, Wien 1981) S. 396-397