Ich Neidunch von Sigendorf der Weinrud vergich und tün chunt allen den die disen prief sehent oder hörnt lesen, die nu lebent und hernach chunftig sind, daz ich mit wol pedachtem muet und mit gunst aller meiner erben, zu der zeit do ich ez wolgetün macht, gegeben han ain lehen gelegen dacz Seben in dem dorf in Hürber pharre mit alle dew und dorzü gehört zu dorf, zu veld, zu holz, zu wismad, gestift und ungestift, versucht^a und unversuecht, wie das genant ist, daz do dient in dew chapplen gen Soczz auf unser vrawn alter ain halbs phunt wachs an unser frawn tag in der vasten, und mein herrn von Soczz einen meczen habern zu vogtrecht und nicht mer. Und das egenant lehen han ich gegeben meiner tochter vrawn Elspeten und iren erben zu ainen ledigen purkchrecht vreileich zu haben, verkaufen, verseczen, geben swem si wellen an allen irsal. Es sullen auch mein herrn von Soczz von dem egenanten guet nemen weder stewr noch ungelt nicht mer denn iren rechten dienst; und sol auch si und irr erben des egenanten guets stifter und störer sein. Es sullen auch mein herren von Soczz des vorgenanten guets scherm und gwer sein für all ansprach, als purkrechts recht ist und des landes zu Osterreich. Wann ich nicht aigens insigels han, zu pesser sicherhait und zu ainem waren gezeug gib ich disen brief versigelten mit meiner herrn insigel von Saczz herrn Chunrats und Otten seins sunes und Chunraten seins pruder sün, dew der sach gezeug sind mit iren anhangunden insiglen. Der brief ist gegeben do von Christes gepurd ergangen waren tausent jarr drewhundert jarr darnach in dem neun und vierzigistem jare, an sand Michels tage.

Source Fulltext: LAMPEL, Urkunden Sanct Pölten (=FRA I, Wien 1981) S. 424-425