Ich Chol von Seldenhofen und ich Elspet sein hausfraw und unser erben verjehen offenbar an dem brief allen den di in sehent, lesent oder hornt lesen, die nün lebent und hernach chunftig werdent, das wir unsers rechten aigens geben haben ain phund gelts gelegen auf der Wilden oed, auf einem hof do die zeit Dietreich aufgesessen was, und drei schilling gelts auf einer hofstat da bei auf der Od, do die zeit Ott auf gesessen was, das unser recht aigen zue Ochsenburkch gewesen ist, dem erbern ritter hern Wulfingen dem Veyertager und seiner hausfrawen Chunczen und allen iren erben zu ainem rechten widerwechsel fur das güt, gelegen datz Stainveld auf zwain behausten halben lehen, dew auch dient ein phund wienner phenning und drei schillingelts ze Ganczendorf die gelegen sind auf einer hofstat. Den vorgenanten widerwechsel hab wir darumb getan, das uns die vorgenanten gueter, dew uns her Wulfing gegeben hat, unserm haus zu Ochsenburch pazz gelegen sind wann enew; und hab auch im die zwelf schilling gelts auf den Hentelperg die von uns und von unserm haus ze Ochsenburch ze lehen gewesen sind, und siben schilling gelts an der Wis do die zeit Fridreich auf gesessen was, das auch von uns und von unserem haus ze Ochsenburch ze lehen was, die vorgenanten neunzehen schilling gelts hab wir her Wulfingen dem Veyrtager und allen seinen erben aufgeben ze rechtem purkrecht, also beschaidenlich das sew und wer die gueter furbas innhat uns zu unserm haus^a ze Ochsenburkch alle jar von idlichem güt vier phenning dienn sullen an sand Michaelstag zu rechtem purkrecht, als purkrechts recht ist in dem land ze Osterich; und sullen auch sew allen iren frum damit schaffen mit den vorgenanten guetern so es in allerpest chümpt und fuget. Das die rede stät und unzebrochen beleib, dar uber so gib ich im vorgenanter her Chol von Seldenhofen den brief versigilt mit meinem anhangunden insigil. Diser sach ist zeug: der erber herr her Gotschalig von Neyperch mit seinem insigil und her Rueprecht von Schonberch mit seinem insigil. Der brief ist geben nach Christi gepurde dreuzehen hundert jar darnach in dem funfzigistem jar, an sand Johanns tag ze sunybenden.

Source Fulltext: LAMPEL, Urkunden Sanct Pölten (=FRA I, Wien 1981) S. 425-426