Ich Chunigund von Hochenberg vergich und tun chund allen den die disen brief sehent oder lesent oder horent lesen, di nu lebent oder hernach chunftig werdent, das ich mit wolbedachtem muet und mit aller meiner erben willen und gunst und mit gesampter hant, zu der zeit da ich es wol getun mocht, durch meiner sel und aller meiner vodern sel hail willen geben hab den herren und der samnung gemain geistlicher Ordnung des gotshaus datz Sand Polten auf ir oblai meins rechten chauf aigen zehen schilling und sechzehen phennig gelts wienner muns, die da ligent ze Michelrust auf ainem weinzurel gericht, das ee gewesen ist hern Hainrichs des Sumerawer, da man von dient virzigk^a phennig ze ostern, virzigk phennig ze phingsten und sechs schilling und acht phennig an sand Michelstag und acht phennig fur zwai vaschanghüner, also beschaidenlich das die vorgenanten herren des gotshaus dacz Sand Polten und all ir nachkommen meiner mueemen frawn Elspeten der Ladendorferinn ewigklichen alle jar davon begen sullen einen jartag an sand Blasy tag mit mess und mit vigili und mit geistlichen werchen, als anderjartäg sit und gewonhait ist in dem vorgenanten gotshaus datz Sand Polten. Si sullen auch mit dem vorgenanten guet datz Michelrust und mit alle dem^b und darzu gehort, bestift und unbestift, versucht und unversücht, wie so das genant ist, allen iren frummen damit schaffen, als mit ander irem gotshaus aigen an all irrung; und solich des ir recht scherem und gewer sein fur all ansprach, als chauf aigen recht ist und des landes recht ze Osterrich. Nemmen si daruber schaden mit recht, denselben schaden sol ich in genzlich ablegen, und sullen si das^b haben datz mir und auf allem dem guet das ich hab in dem lande ze Osterich. Das die redt stet^b und unzebrochen beleib, daruber gib ich den briefe versiglten mit meinem insigill und mit meiner sün insigill hern Dietreichs und hern Stephans von Hochenbergk. Der^c brief ist geben nach Kristi gepurde dreuzehnhundert jar darnach in dem drew und funfzigistem jar, an sand Bartholomeus tag.

Source Fulltext: LAMPEL, Urkunden Sanct Pölten (=FRA I, Wien 1981) S. 443-444