Ich Götfrid der Sebech und Chunegunt sein hausfraw und unser baider erben und ich Rueprecht der Sebech sein sune und ich Elspet sein hausfraw und unser baider erben verjehen und tün chunt allen den die disen brief lesent oder horent lesen, daz wir ze kaufen haben gegeben dem erbern richter herrn Wulfing dem Veirtager und sein erbn unsers rechten aigens sechs schilling wienner phenning gelts die da ligent auf ain lehen und auf zwain purkrecht ekcheren ze Wielantstorf umb zehen phunt wienner phenning, der wir ganz und gar gewert sein, und sullen si damit furbas allen iren frum schaffen mit verseczn und verkaufen und geben swem si wellen; und sullen des ir recht scherme und gwer sein für alle ansprach, als aigens recht ist und des landes recht ze Osterreich. Nemen si daruber schaden mit recht, denselben schaden sullen wir inn genzlich ablegen und sullen si das haben auf uns und auf allem unserm gütt, das wir haben in dem land ze Österreich, wir sein lemtig oder todt. Daz die rede also stet beleib‚ darüber geben wir inn disen brief versigelt mit unsern^a anhangunden insiglen. Der brief ist geben nach Kristes pürt uber dreuzehenhundert jar darnach in dem funf und funfzigistem jar, an sand Jorgen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 451-452