Wi^er Chunrat von gotes genaden abpt ze Tegernsewe, Chunrat dechant und aller convent des selben gotzhaus verjechen und tuen chunt offenwar mit dem brief allen den die nu^e lebent o^eder^a chunftig sind, umb alle die chrieg und stoezz di zwischen uns an ainem tail und zwischen des erbern geistleichen herren hern Vlreichs brobst ze Sand Poelten und seines conventz da selben an dem andern tail gewesen sind unz auf disen heutigen tag von des weinzechentz wegen auf unsern weingarten gelegen in der Wochawe, daz wier der selbe chrieg und stoezz uetwillichleichen und mit guetleichem willen gegangen sein hinder den erwierdigen geistleichen herren hern Vlreichen den abt voen dem Choetweig, also swaz der von seinen trewen daru^eber spræch, minne oder recht, das wier daz alles genzleichen stet haben wellen und sullen an alle chrieg und ierrsal. Nue hat er ge sprochen, daz wier unser zwo peunt⁴ di obern und die nidern gelegen in der Wochawe bei Anger di do stoezzent an den Nidern weg an ainem tail und an den Mitter weg an dem andern tail neben des obgenanten geistleichen herren hern Vlreichen brobst und des conventz ze Sand Poelten weingarten und die auch gelegen sind hinder unserm hof ze Jewching fuerbas ewichleichen ledig und vrei haben sullen vor allem zechent, wier pawn di selb mit unsern phenningen, wier verchaufen's oeder swem wier die lazzen. Er hat auch gesprochen, das wier in furbas ewichleichen von unsern zwain weingarten gelegen ze Anger die an unser ob genanten zwo peunt sto^ezzent, und auch von allen unsern weingarten gelegen in der Wochawe, swie die genant sind, an alle widerred rechtichleichen zechent geben sullen wir oder wer di selben weingarten von unsern wegen inne hat. Auch hat der egenant erwierdig geistleich herre der abt von dem Cho^etweig gesprochen, daz aller schad der auf den obgenanten chrieg gegangen ist, wie sich der vergangen hat oder wie der genant ist, auf baiden tailen genzleich ab sulle sein furbas ewichleich an alle ansprach. Dar uber ze ainem warn u^erchund allez daz stet und unzebrochen ze halden‚ das oben geschriben ist, geben wier in disen brief versigelten mit unsern anhangenden insigeln. Das ist geschechen da nach Christi gepu^erd ergangen waren dreuzehen hundert jar und dar nach in dem ain und sechzkistem jar, an sand Mychels tag.

Source Fulltext: LAMPEL, Urkunden Sanct Pölten (=FRA I, Wien 1981) S. 532-533