Ich Jans der Veyrtager, ich Margret sein hausfraw und all unser erben vergehen und tün chunt allen den di disen brief ansehent oder hörnt lesen, di nu lebent und hernach chünftig sind, das wïr mit wolbedachten müt, mit gu^etlichem willen, ze der zeit do wïr es mit recht wol getün machten und mit unsers lehenherren hant, dez erberdigen fürsten abbt Johans ze Melkch, recht und redlich verchouft haben daz halb haus ze Vridaw, das ich egenanter Jans gegen meinen pruder Chünraten dem Veyrtager han mit alle dew und zu demselben halben haüs gehöret, swie so daz genant ist oder swö so das gelegen ist‚ daz von dem götshaus ze Melkch ze lehen ist, und ouch ain peunt vör dem tor doselbs ze Vridaw gelegen und daz vi^ertail dez haspan, daz unser rechtes aigen ist, und di halben vischbaid, di wïr von dem edeln und höchgeparn fürsten hertzog^a Ru^odolffen ze Österreich, ze Steyr und ze Ke^arnden ze lehen haben, daz allez in daz egenant haus ze Vridaw gehöret; dasselbig häus mit alle dew und dar zü gehöret, als es oben benant ist, haben wïr verchouft und geben umb achtzg phunt wiennär phenning der wïr ge^anzlich verricht und gebert sein, dem vorgenanten Chünraten dem Veyrtage^ar unserm lieben prueder und allen sein erben fürbaz ledichlich und vreilich ze haben und allen sein frumen do mit ze schaffen, verchaufen versetzzen und geben, swem sew wellen, an allen chrieg und ïrsal; und sein ouch dez ir recht geber und scherm für all ansprach, als aigens und lehens recht ist, und daz lantz recht in Österreich. Get in fürbaz daran icht ab mit recht, oder ob sew mit recht icht chrieg oder ansprach daran gebunnen von swem daz we^ar, daz schu^elln wir in allez ausrichten ablegen und widerchern an all i^er mûe und ouch an allen iren schaden, und schu^ellen sew daz unverschaidenlich haben auf uns und auf allem unserm gu^et daz wir haben in dem lande ze Österreich, wïr sein lebentig oder töd. Daz der chauf fürbaz also ge^anzlich stet und unzebrochen beleib, darumb so geb wi^er den brief zu ainem offen urchunt der sach versiglt mit mein obgenanten Jansen des Veyrtager insïgl, mit meins lieben herren insigel hern Ülreichs des Veyrtager probst des götshaus ze Sant Po^elten, mit meins lieben swager insigel hern Chünrats von Weytra³ und mit Pernoltes insigel des Chlingenfürtär⁴ di wir dez vleizzichlich gepeten haben, daz sew der sach zeugen sind mit iren insigeln. Der brief ist geben nach Christi gepürd drewzehenhundert jar darnach in dem drew und sechzgistem jar‚ an sant Giligen tag.

Source Fulltext: LAMPEL, Urkunden Sanct Pölten Nachtrag (=FRA II, Wien 1901) S. 422-423