Wier Ru^edolf der vierd von gotes genaden erzherzog ze Oesterreich, ze Steyer und ze Kaernden, herr ze Chrayn, auf der Marich und ze Porttnawe, graf ze Habspuerg, ze Tirol, ze Phyrt und ze Kybuerg, marichgraf ze Purgowe und lantgraf in Elsazz bechennen und tuen chunt offenleich mit disem brief allen den di in sehen, lesen oder hoeren lesen, das der erbaer und geistleich man probst U^elreich von Sand Poelten unser lieber chapplan fuer uns pracht ein hantfest in latein geschriben, di unser lieber herr und ueren kunig Ru^edolf saelig von Rom seinem goczhaus geben hat, und pat, das wier di selben hantfest geruechten ze teutsch machen. Das haben wir getan mit den Worten als hienach geschriben stet.¹ Seind nu wier vorgenanter herzog Ru^edolf dis hantfest also in teutsch gechert haben, als da vor geschriben stet, vernewen und bestaetigen wier alle stukch und artikel di dar inn gemerkchet und begriffen sind und haben dem obgenanten probst, seinen nachkomen und seinem gotzhaus durich got und unserr sel hail willen und auch zu trost und hilf allen unsern vordern und nachkoemen di genad zuegeben: des ersten das nieman iers gotshauzz und ierr gueter vogt und scherm sei, denn wier, unser prueder oder eriben und nachkoemen, nach sag ierr hantfest und brief di si von Roemischen chaisern und chuenigen und von andern fuersten dar u^eber habent; waer aber iemand der eribvogtai auf iern guetern jaech, der schol uns des mit uerchuenden weisen, und geschaech dann dar ueber was recht sei. Wenn auch ein pharrer auf iern chirichen, di si leihent, stirbt oder sust verchert wiert, so schol dhain vogt noch puerkchgraf mit den pharrhoefen ze schaffen haben, wann der probst und di chorhern von Sand Poelten selb schuellen der egenanten pharrhoef und swas dar inn ist gewaltig sein, als andrer lehenhern recht und gewonhait ist. Da von enphelichen wier allen unsern houptleuten und amptleuten gegenwuertigen und chuemftigen und allen andern unsern undertanen, wie di genant sind, das si das obgenant gotzhaus von Sand Poelten pei der hantfest und pei den gnaden ewichleich beleiben lazzen an alle ierrung. Wer das u^eberfu^er, der sol uns, unsern brueedern, eriben und nachkoemen ze pessrung vervallen sein zwainzigk mark goldes und dem egenanten gotzhaus von Sand Poelten auch zwainzig mark goldes. Diser sach sind gezeugen: der edelgraf Vlreich von Schowenberch unser lieber oehem, unser getrewn lieben: Eberhard von Walsse houptman ob der Ens, Leutold von Stadekk lantmarschalich in Oesterreich, Jans Traunaer houptman ze der Freinstat,^a Wernhart von Meissowe, Stephan von Hohenberch, Ru^edolf von Losenstain, Otakcher der Roraer, Stephan Toplaer, Alberschench von Ried unser vorstmaister, Niclas der Schekchphleger ze Steyr, Hainreich von Rappach unser hofmaister, Jans Losperger unser chamermaister und ander erbaerr lëut genueg. Und des ze uerchuend geben wier disen brief besigelten mit unserm grozzen fuerstleichen anhangunden insigel, der geben ist ze Sand Poelten, an sand Veits tag, nach Christi gepu^erd dreuzehen hundert jar darnach in dem drew und sechzigistem jar, unsers alters in dem vier und zwainzigistem und unsers gewalts in dem fuemften jar.||
† Wier der vorgenant herzog Ru^edolf sterken disen brief mit||
dirr underschrift unser selbs hant. †

Source Fulltext: LAMPEL, Urkunden Sanct Pölten (=FRA I, Wien 1981) S. 573-575