Ich Ott von Zinzendorf, ich Christan von Zinzendorf sein sun‚ ich Elspet von Zinzendorf sein swester, und all unser erben vergehen und tuen kunt allen den di den brief an sehent oder hoernt lesen, di nu lebent und her nach chuenftig sind, das wier mit wolverdachtem muet, mit guetlichem willen, ze der zeit do wier es mit recht wol getuen machten, recht und redlich verchauft haben unsers rechten vrein aigens das wier haben, ^a di zwai tail des hofs ze Weydorn, di wier gegen dem edeln herren von Rosenberch haben, ^b do ze der zeit Oebrecht auf gesezzen ist und der alle jar dovon dient vierzg metzen choern, vierzg metzen habern, aecht chês der ieglicher fuemfzehen wienner phenning wert ist, vierzg aier, ain gans oder aecht phenning‚ vier heribsthuenr der ieglichs zwaier phenning wert sei, und anderthalb vaschang huen di sechs phenning wert sein, ze rechtem puerkchrecht; di zwai tail desselben hofs mit alle di und dar zue gehoeret ze velde und ze dorf, gestift und ungestift, versuecht und unversuecht, wie so das alles genant ist oder woe so das alles gelegen ist und ouch mit allen den ern nuetzen und rechten, als wier di unz auf disen heutigen tag unversproechenlich in nutz und in gewer her pracht haben, haben wier verchauft und geben umb ains und vierzg phunt fuemf schilling und sechs und zwainzg phenning, alles wienner muenze, der wier genzlich verricht und gewert sein, dem erberdigen geistlichen herren hern Vlreichen dem Veyrtager probst ze Sand Poelten und dem convent gemainlich doselbs fuerbas ledichlich und vreilich ze haben und allen iern fruemen do mit ze schaffen, verchaufen versetzen und geben wem si wellen an allen chrieg und iersal. Und sein ouch wier der ier recht gewer und scherm fuer alle ansprach, als aigens recht ist und des landes recht ze Oesterreich. Get in fuerbas daran icht ab mit recht oder ob si mit recht icht chrieg oder ansprach daran gebuennen, von wem das wêr, das suellen wier in alles ausrichten an allen iern schaden und an alle ier mûe, und suellen si das haben auf uns unverschaidenlich und auf allem unserm guet, daz wier haben in dem lande ze Oesterreich oder woe wier das haben, wier sein lebentig oder toed. Daz der chauf also genzlich stêt und unzebroechen weleib, daru^eber so geben wier dem voergenanten hern Vlreichen dem Veyrtager probst ze sant Poelten und dem convent doselbs den brief versiglt mit mein obgenanten Otten insiegl von Zinzendorf^a und mit meins prueder insigel Gundakcher des Werdaer,² mit meins ohaims insigel U^olreichs von Planchenstain, mit meins vettern insigel Chadoltz von Zinzendorf und mit hern Ru^odolffs insigel von Losenstain, di wier des alle vleizzichlich gepeten haben, daz si der sach zeugen sind mit iern insigellen; wenne ich obgenanter Christan von Zinzendorf, ich Elspet von Zinzendorf nicht aigner insigel enhaben, so verpind wier uns mit unsern trewen under di gegenburtigen insigel alles das stêt ze haben das voer geschriben stet. Der brief ist geben nach Christes gepu^erde drewzehen hundert jar darnach in dem vier und sechzgistem‚^c an sant Petronellen tag.

Source Fulltext: LAMPEL, Urkunden Sanct Pölten (=FRA I, Wien 1981) S. 589-590