Wir Jans von gots gnaden abt ze Melkch beken offenbar mit dem brief, das für uns kam der erber beschaiden Chunrat der Veier tager und macht uns chunt, daz er dem erwirdigen geistlichen herren herrn Vlreichen dem Veirtager probst ze Sand Polten sein haus ze Fridaw halbs und alles das das zu demselbem halbem haus gehoret, wie das genant ist, das er von uns und unserm goczhaus ze purkrecht hat, und dint uns dasselb haus ganz alle jar an sand Michelstag zwelif wienner phenning ze purkrecht und nicht mer, für hundert phunt wienner phenning, die er im berait ze rechter not gelihen hat, ge saczt hab, als sein brief sagent, di er im gegeben hat, und pat uns mit fleizze, wir geben zu dem sacze unsern willen und urlaub. Nu haben wir an gesehen sein vleizzig pet und seinen besundern dinst und haben dem egenanten geistlichen herrn herrn Vlreichen brobst ze Sand Polten das vorgenant haus ze Fridaw halbes mit aller zu gehorung nach seiner brief sag gelihen, als saczung recht ist und des landes gewonhait in Österreich, als vil wir von recht solten und machten. Mit urkund des briefs versiglt mit unserm insigel. Geben ze Melkch, an dem nachsten suntag nach sand Margreten tag,¹ nach Kristes gepurd dreuzehenhundert jar darnach in dem fumf und sechzigistem jare.

Source Fulltext: LAMPEL, Urkunden Sanct Pölten (=FRA I, Wien 1981) S. 639-640