Wier Albrecht von gotes genaden herzog ze Oesterreich, ze Steyer, ze Kernden und ze Chrain, graf ze Tyrol etc. tuen chunt, das der erber und geistleich unser lieber chapplan probst U^elreich von Sand Poelten zu seinen und seins gotzhaus handen mit unserm willen und gunst von Hansen Mainberger und Maricharten dem Haewsler gechouft und gewarben hat ain vischwaid auf der Pyela pei Uetendorf und Foellderndorf, di ze lehen von uns was und di ietzund Hans Syrnikcher und Goerig der Uetendorffer innhabent. Davon haben wier durich got und uns allen unsern vordern und nachkoemen ze hilf und ze trost di aigenschaft an derselben vischwaid gegeben und geben auch wizzentlich dem obgenanten probst und seinem convent und gotzhaus ze Sand Poelten, daz si di innhaben als ander aigen guet. Mit u^erchund ditz briefs, der geben ist ze Wienn, an unser vrowen abent ze heribst, nach Christes gepu^erde dreuzehen hundert jar darnach in dem siben und sechzigistem jar.

Source Fulltext: LAMPEL, Urkunden Sanct Pölten (=FRA I, Wien 1981) S. 703