Ich V^elreich der Po^erner und ich Dorothea sein hausvrowe und all unser eriben vergehen und tu^en chunt allen den di den bri^ef an sehent oder ho^ernt lesen di nu lebent und hernach chu^enftig sind, das wi^er mit wolbedachtem mu^et und mit gesampter hant, z'der zeit do wi^er es mit recht wol getu^en mochten, recht und redlich verchouft haben unsers rechten aigens di aigenschaft unsers hofs genant datz den Po^emeren und gelegen am Engelsperg in Wilhalmspurger pharr und alles des das in den selben hof geho^ert, es sei pau wismad oder holz, ze veld und ze dorfe, gestift und ungestift, versu^echt und unversu^echt, wie das alles genant ist und wo das gelegen ist; die selben aigenschaft des vorgenanten unsers hofs und seiner zu^egeho^erung haben wi^er verchouft und auch auf gegeben dem erwi^erdigen geistleichen herren hern U^elreichen dem Veyrtager probst des gotzhaus datz Sand Po^elten umb aindlef phunt wienna^er phening, der wi^er genzlich verricht und gewert sein, so beschaidenlich das wi^er denselben unsern hof und was dar zu^e geho^ert fu^erbas von im, von seinem gotzhaus und von allen seinen nachko^emen ze rechtem lehen haben schullen und wellen, als lehens recht ist in dem land ze O^esterrich. Auch sein wi^er des i^er scherm und gewer fuer alle ansprach. Gret aber in dar an icht ab mit recht, das schullen si haben auf uns und auf allem unserm gu^et, wi^er sein lebentig oder tode. Des ze u^erchund geb wi^er den brief versigelt mit mein obgenanten U^elreichs des Po^emer insigel, mit meins pru^eder insigel Otten des Po^emer,² mit Pernharts des Hesinger insigel mein obgenanten Dorothea pru^eder, mit Otten insigel von Harssendorf und mit U^elreichs des Chlingen insigel, di der sache zeugen sind mit i^ern insigeln. Geben datz Sandpo^elten, nach Christes gepu^erd dreuzehen hundert jar darnach in dem a^echt und sechzigistem jar, an sand Matheus abende.

Source Fulltext: LAMPEL, Urkunden Sanct Pölten (=FRA II, Wien 1901) S. 36-37