Gregorius episcopus servus servorum dei^a dilecto filio abbati monasterii Chottwicensis^b Pataviensis diocesis salutem^c et apostolicam benedictionem. Exhibita nobis pro parte dilectorum filiorum Johannis prepositi et conventus monasterii sancti Ipoliti^d per prepositum soliti gubernari ordinis sancti Augustini Pataviensis diocesis peticio continebat, quod cum eorum monasterium, in quo divinus cultus et observancia regularis pre ceteris partium earundem monasteriis hactenus viguerunt, propter guerrarum discrimina et epidimie pestes multum in facultatibus esset collapsum, quondam^e Rodolphus dux Austrie, verus patronus parrochialis ecclesie sancti Stephani in Reza dicte diocesis, eidem monasterio et personis in eo degentibus pio compaciens affectu, ut hospitalitatis et alia pietatis opera possent in eo ut consueverunt exerceri, ius patronatus ipsius ecclesie preposito et conventui ac monasterio predictis contulit, ac bone memorie Gotfridus episcopus Pataviensis premissa pie considerans premisso tractatu solenni^f cum dilectis filiis capitulo ecclesie sue Pataviensis et deliberatione intra se habita diligenti ecclesiam predictam cum omnibus iuribus et pertinenciis suis eisdem preposito et conventui ac monasterio auctoritate ordinaria pro eorum necessitatibus relevandis et supportandis annexuit univit imperpetuum et incorporavit, ita quod cedente vel decedente ipsius ecclesie rectore qui tunc erat vel dictam ecclesiam alias dimittente, liceret eis corporalem possessionem ecclesie ac iurium et pertinentiarum predictorum^g per se vel alium seu alios auctoritate propria apprehendere et tenere, cuiusquam licencia minime requisita, ac per unum de canonicis ipsius monasterii vel per unum secularem presbyterum, cui de fructibus dicte ecclesie necessaria congrue ministrentur,^h prefate ecclesie facerent deserviriⁱ laudabiliter in divinis. Quare pro parte dictorum prepositi et conventus nobis fuit humiliter suplicatum, ut cum annexio unio et incorporacio huiusmodi in preiudicium ordinarii loci et ecclesie Pataviensis non redundaret premissis omnibus per dictos episcopum et ducem factis robur confirmationis adicere de benignitate apostolica dignaremur. Quia igitur de premissis certam noticiam non habemus, discrecioni tue, de qua fiduciam in domino specialem obtinemus, consideracione eciam carissimi in Christo fïlii nostri Caroli Romanorum imperatoris semper augusti super hæc^j nobis humiliter suplicantis committimus^k et mandamus, quatenus vocatis qui fuerint evocandi de premissis omnibus et singulis et eorum circumstanciis universis et presertim de statu^l ecclesie parochialis ac indigencia monasterii predictorum diligencius te informes et quicquid^m per huiusmodi informationem reppereris in premissis nobis per tuas litteras in publicam formam redactas tuoque sigillo sigillatas harum seriem continentes nobis quantocius intimare procures, ut tua super hiis informacione instructi in premissis consultius agere valeamus. Datum Avinione‚ XV. kal. novembris, pontificatus nostri anno primo.||
P. de Fabrica R.ⁿ

Source Fulltext: LAMPEL, Urkunden Sanct Pölten (=FRA II, Wien 1901) S. 111-112