Sanctissimo in Cristo^a patri ac domino domino Gregorio digna dei providentia sacrosancte Romane ecclesie summo pontifici Ulricus abbas monasterii Chotwicensis ordinis sancti Benedicti Pataviensis diocesis cum omni obedientia devota pedum oscula beatorum. Beatissime paternitatis vestre litteras suspicionis vicio carentes sub vera bulla plumbea pendente in canapi cordula michi per dominum Johannem bone memorie quondam prepositum monasterii Ypolitensis canonicorum regularium ordinis sancti Augustini dicte diocesis presentatas cum decenti humilitate reverenter recepi in hec verba. Gregorius³ episcopus servus servorum dei⁴ dilecto filio abbati monasterii Chotwicensis Pataviensis diocesis salutem et apostolicam benedictionem etc. ut supra. Datum Avinione XV. Kal. novembris pontificatus nostri anno primo etc.⁵ Quibus litteris visis et humiliter receptis, volens beatissime paternitatis vestre mandatis, prout teneor, humiliter obedire, feci ad diligentem instanciam dicti domini prepositi non nullos testes, scilicet canonicos plebanos barones milites nobiles et vulgares ydoneos et fide dignos peremptorie citari et eos medio iuramento de veritate dicenda ad sancta dei ewangelia per eos corporaliter tacta diligenter examinari coram publico notario et testibus fide dignis, et dictum prepositum munimenta documenta seu instrumenta ac probaciones quascumque pro^b huiusmodi informacione producere. Unde ex dictorum testium et instrumentorum informacione, prout et alias in diocesi Pataviensi et locis vicinis satis notorium et^c publicum palam et manifestum repperi ac didici, quod in eodem monasterio Ypolitensi dei cultus et officia divina pre ceteris monasteriis dicte diocesis sollempnius celebrantur ac canonicis dicti monasterii in statutorum regularium observancia morum honestate et vita laudabili merita singulariter suffragantur. Et quod prefatum monasterium Ypolitense propter diversas et graves principum gwerras nimis est depauperatum et per hospitalitatem nobilium pauperum peregrinorum debilium et elemosinarum largiciones multiformiter aggravatum ac per incendium ignis semel totaliter combustum et post reedificacionem iterum bina vice igne destructum et per pestilenciam seu hominum mortalitatem, que ter fuit infra viginti quatuor annos, ob defectum hominum et desolacionem agrorum et vinearum in diminucione fructuum et decimarum ac bonorum nimis extenuatum et in facultatibus collapsum, ita quod divinus cultus ibidem quodammodo fuit diminutus, et quod prepositus et monasterium Ypolitense absque suffragio incorporacionis ecclesie in Recza ad dictum monasterium non possent sine magna penuria sustentari; preterea ecclesiam parrochialem in Recza notum est, esse et ab antiquo fuisse simplicem, non habentem beneficia sibi subiecta neque filiales nec dignitatem annexam, que quondam in locacione et in absencia solvere consuevit ultra centum et sexaginta florenos, sed nunc non habet tantum propter vinearum desolacionem et agrorum infertilitatem, et quod ius patronatus dicte ecclesie pertinuit ab antiquo ad duces Austrie, et dux Rudolphus bone recordacionis per piam in Christo compacienciam propter pressuras et indigencias ipsius monasterii predictas preposito et monasterio prefatis ius patronatus ipsius ecclesie in Recza benigniter et libere contulit et donavit. Et dominus Gotfridus quondam episcopus Pataviensis de consensu capituli eandem ecclesiam supradicto monasterio incorporavit et univit, prout in litteris coram me productis plenius continetur. Obligarunt se eciam prepositus et conventus monasterii predicti, quod in procuracione videlicet legatorum sacrosancte sedis apostolice et caritativi subsidii et iuribus episcopalibus velint racione dicte ecclesie parere et effectualiter obedire et, cum se locus et tempus obtulerint, quod velint vicario ipsius ecclesie in Recza tantum de fructibus et redditibus eius assignare et deputare, quod idem rector valeat ipsam ecclesiam in spiritualibus et temporalibus comode et honorifice gubernare. Insuper quia dictus dominus prepositus debitum carnis exsolvit, dominus Lewtoldus nunc prepositus, Nicolaus decanus et Perchtoldus custos dicti monasterii personaliter iurarunt ad sancta dei ewangelia per eos corporaliter tacta, quod credunt omnia et singula esse et fuisse vera que in vestris litteris contenta sunt et expressa. Datum in Chotwico, meo sub sigillo, anno domini millesimo trecentesimo septuagesimo secundo, feria tercia proxima post diem sancte Lucie virginis gloriose, presentibus Henningo presbytero dicto Ron et Symone de Pechstal clerico dicte diocesis et aliis pluribus fide dignis.||
Et ego Weykchardus dictus U^etschalich de Viechtach, clericus Ratisponensis diocesis, publicus imperiali auctoritate notarius, ipsorum testium citacioni et medio iuramento examinacioni et omnibus et singulis premissis presens interfui, vidi et audivi et hanc publicam formam desuper et de mandato dicti domini abbatis Chotwicensis propria manu conscripsi et sigillo suo sigillavi meisque nomine et signo solitis signavi rogatus et requisitus cum dictis testibus in testimonium premissorum.

Source Fulltext: LAMPEL, Urkunden Sanct Pölten (=FRA II, Wien 1901) S. 136-139