Wir Albrecht von gotes genaden herzog ze Osterreich‚ ze Steir, ze Kernden und ze Krain, grave ze Tyrol etc. tun kunt umb das geschafte di stiftunge gabe und ordnunge die Gotfrid selig der Rorer getan hat den erbern geistleichen unserm lieben andachtigen n dem brobst dem convent und dem gotzhaus dacz Sand Polten, und daruber er in nach rat und mit guter wissen seiner frewnd und anderer erberr leut brieve gegeben hat, und die wir^a gesehen und verhort haben, das wir dasselb geschäft gabe und ordnung und die egenanten brieve die^b daruber gegeben sind mit allen iren punden und artickeln bestettet haben, und bestetten auch wissentlich und wellen, das die bei allen iren kreften beleiben und vestichleich gehalten und volfuert werden, an alle widerrede und geverde, wann wir^c mit den egenanten brieven und mit erberen leuten unsern getrewn aigenleich beweiset sein, das alles das an den vorbeschaidnen brieven verschriben stet recht und redlich beschehen ist. Darumb gepieten wir ernstleich und bei unsern hulden unserm getrewn lieben Hansen von Liechtenstain, zu den zeiten unserm hofmaister, oder wer an seiner stat ze Lengbach iczunt ist oder wirt, und allen andern unseren ambtleuten und undertanen das si die vorgenanten klosterleut bei dem vorgenanten geschafte vestichleich halten und beschirmen und in kain irrung oder beswerung daran tun in chainem weg. Mit urkund dicz briefs, geben ze Wienn, an sand Kathreyntag, nach Cristi gepurd dreuzehenhundert jar darnach in dem zwai und sibenzigisten jare.

Source Fulltext: LAMPEL, Urkunden Sanct Pölten (=FRA II, Wien 1901) S. 134-135