Wir graf Burchart purgraf ze Maidburg und graf ze Hardekke und unser erbn tün kunt umb die vier gewanten akchers gelegen under dem Gyebisperg und weilent gehort haben in unsern mairhof daselbs ze Pulka, daz wir die mit verdachtem mut, do wir es mit recht wol getün machten, verkouft haben dem erbern priester herren Chunraten diezeit vicary ze Pulka und seinen erben umb zehen phunt wienner phenning, der si uns ganz und gar gewert habent ze rechten tegen. Si sullen ouch dieselbn vir gewanten furbas innehaben, allen irn frume do mit schaffen, verseczen oder verkoufen, als purkchrechts und landes recht ist in Osterreich, also das si uns oder wer die selben vir gewanten furbas innehat uns alle jarr an sand Michels tag in purkchrechts weise davon dienen sullen acht wienner phenning. Es hatt der egenant herr Chünrat der vicary ze Pulka die vorgenanten vir gewanten und das halb lehen, das er vormals von Thoman Rubein gekouft hat und ouch ze purkchrecht von uns ist und uns alle jarr an sand Michels tag dient ain halb phunt phenning und ain huen, mit unsern handen und gueten willen gefuegt und gemacht seiner müter frowen Gerdrawten und seiner swester Margreten und allen iren erben, also beschaidnlich: ob der vorgenant herr Chünrat ee abgieng mit dem tod und stürb den dieselb sein mueter und sein swester, daz den der vorgenant akcher mitsampt dem halbm lehen erben und gevallen sol auf si und auf ir erben. Und wir sein ouch des irr recht scherm und gewer als purkchrechts recht ist und des landes in Osterreich, an alles gever. Mit urkunt des briefs besigelt mit unserm insigil² und mit unsers diener^a insigil Paulen des Ladendorfer, der es daran legt ze ainer zeugnuß im an schaden. Der brief ist geben an sand Lucein tag, do man zalt nach Krists^b gepurt dreuzehenhundert jarr darnach in dem sechs und sibenzigistem jare.

Source Fulltext: LAMPEL, Urkunden Sanct Pölten (=FRA II, Wien 1901) S. 185-186