No, 222. 1444. 19. Mai.

Wir von gotes gnaden Friderich des heiligen Römischen reichs ertzmarschalg vnd Wilhelme gebrudere herczogen zcu Sachsen, lantgrauen in Doringen vnd marc- grauen zcu Missen. Als wir in vimsern landen vnd furstenthuinen eine satczung haben gemacht, den selben vnnsern landen vnd luten zcu gemeynem nutcz vnd fro- men, das ein yderman, der Numburgisch bier furbas füren wurde, vns zcu czolle vnd geleyte von einem iglichen fuder biers ein gülden geben «olle, des haben wir von besunder Sachen wegen vnnsern lieben getruwen dem rate vnnser stat Lipczk die gunst vnd gnade gethan, das sie vns von allem Nuwemburgischen bier, das sie biß- her zcu gemeynem nutz derselben vnnser stat Lipczk gefurt haben vnd hinfur in czukumfftigen zceiten biß uff vnnser widerruffen zcu gemeynem vnnser genanten stat nutz vnd fromen füren werden, gefryet haben vnd fryen sie auch in crafft dits brieffs, also das sie vns nach vnnser vorgemelter satczunge keinen zcoll nach gleite anders danne so vor alter herkomen ist dauon biß uff vnnser widerruffung geben sollen ongeuerde. Des zcu rechtir bekentnisse haben wir vnnser insigele uff dissem brieff gedruckt, der geben ist zcu Wissenuels des dinstags nach dem sontage Vocem Jocunditatis anno domini millesimo CCCC° quadragesimo quarto.

Nach dem Cop. 42. fol. 111 im K. Haupt-Staatsarchiv zu Dresden und dem Copialbuch I. fol. 13 im Rathsarchiv zu Leipzig.