Wir Karl, von gotis gnaden romischer keiser, zu allen czeiten merer des reiches vnd konig zu Beheim, bekennen offenlichen mit desem briue vnd tun kunt allen den, dy en sehen adir horen lesen, das wir haben angesehen fleissige vnd ernstliche bete des hochgebornes Bolken, herczogen zu Slesie, hirre zur Sweidnitz vnd zum Jawor, vnsers liben swagers vnd fursten, vnd habin mit wolbedachtem mute mit rate vnserr getrawen vnd mit rechtir wissen als ein konig zu Beheim seiner stat zu der Lewemberg vnd allen den, dy dorynne wonend, dy gnade getan vnd tun auch mit crafft dicz briues fur vus vnd alle vnser erben

vnd nochkomen konige zu Beheim, also das sy furbas ewiclich besampt adir be- sunder nicht sullen geben dheinerley czoll noch vngelt von alle dem, das von irentwegen kompt adir bracht wirdet in vnser stat zu Bresslaw, was das sey adir wy is genant sey, es sein wegen adir welchirley kouftmanschafft das sey, nichtis vsgenomen, gleicherweis als auch dyselben von Bresslaw wedir czoll noch vngelt geben in der stat zu der Swidnicz als auch den von Bresslaw selbir wol wissent lichen ist. Darumb gebieten wir festiclich vnd ernstlich dem rate, den czollnern vnd der stat gemeinlich zu Bresslow, vnsern liben getrawin, das sy furbas ewic lich dy genantin burger von der Lewemberg vnd ire erben vnd nachkomen an der vorbeschrebenen gnad, dy wir en also habin getan, nicht hindern, auffhalten, hin adir her zu faren in dheinweis, als lip yn sey, vnser hulde zu behalden. Mit vrkunt dicz briues vorsigilt mit vnserr keiserlichen maiestaten ingesigil, der geben ist zu Prage noch Crista geburte dreyczenhundirt iar, darnoch in dem drew vnd sechczigisten iare am nestin sonnabent vor santte Vites tage, vnserr reiche in dem sibenczenden vnd des keisertums in dem newnden iare.