Alexander episcopus, servus servorum Dei, dilectis filiis, Rein(aldo) abbati monasterii Sancti Martini in monte super Pannoniam siti eiusque fratribus tam presentibus quam futuris regularem vitam professis in perpetuum. Quotiens illud a nobis petitur, quod religioni et honestati convenire dinoscitur, animo nos decet libenti concedere et petentium desideriis congruum suffragium impertiri. Eapropter, dilecti in Domino filii, vestris iustis postulationibus clementer annuimus et prefatum monasterium, in quo divino estis obsequio mancipati, sub Beati Petri et nostra protectione suscipimus et presentis scripti privilegio communimus, inprimis siquidem statuentes, ut ordo monasticus, qui secundum Deum et Beati Benedicti regulam in eodem monasterio institutus esse dinoscitur, perpetuis ibidem temporibus inviolabiliter observertur (!). Preterea quascumque possessiones, quecumque bona idem monasterium inpresentiarum iuste et canonice possidet, aut in futurum concessione pontificum, largitione regum vel principum, oblatione fidelium, seu aliis iustis modis prestante Domino poterit adipisci, firma vobis vestrisque successoribus et illibata permaneant. In quibus hec propriis duximus exprimenda vocabulis: locum ipsum, in quo prescriptum monasterium constructum est, cum omnibus pertinentiis suis; in episcopatu Vespremiensi ecclesiam Sancti Martini in villa Caurisi constitutam, in villa Tardi ecclesiam Domini Salvatoris, in villa Toppe ecclesiam Sancte Marie cum universis pertinentiis suis; in episcopatu Geuriensi ecclesiam Sancti Martini in Sabaria, et ecclesiam Sancti Willibaldi, ecclesiam Sancte Marie Capelle, ecclesiam Sancte Marie in Fizio, ecclesiam Sancti Adalberti in Wasciana cum omnibus earum appendiciis; in archiepiscopatu Strigoniensi ecclesiam Sancte Marie in Wagni cum omnibus pertinentiis suis, oratorium in villa porcorum custodum in silva Seliz, oratorium in Digna. Ad hec iuxta vestigia antecessoris nostri Paschalis pape, secundum quod a beate memorie Stephano rege statutum est, presenti privilegio statuimus, ut nulli regum, nulli comitum, nulli episcoporum, nulli cuiquam alii de rebus, que iam dicto monasterio collate sunt et commisse, vel in posterum canonice conferende, minuere liceat vel auferre (seu ablatas retinere). Crisma (vero), oleum sanctum, consecrationes altarium seu basilicarum, ordinationes monachorum et clericorum vestrorum, qui ad sacros ordines fuerint promovendi, a dyocesano suscipi(etis episcopo, si quidem) catholicus fuerit et gratiam atque communionem apostolice sedis habuerit, et ea gratis et absque pravitate aliqua vobis voluerit exhibere; alioquin liceat vobis, quemcumque malueritis, adire antistitem, qui nimirum nostra fultus auctoritate, quod postulatur, indulgeat. Liceat etiam vobis liberas et absolutas personas e seculo fugientes ad conversionem recipere et in vestro monasterio absque contradictione aliqua retinere. Prohibemus insuper, ut nulli fratrum vestrorum post factam in loco vestro professionem fas sit de eodem loco absque licentia abbatis sui discedere, discedentem vero absque communium litterarum vestrarum cautione, nisi obtentu arcioris religionis, nullus audeat retinere. Monachos etiam et sanctimoniales eidem monasterio subiectas sine cuiuscumque prohibitione vobis liceat iudicare. Baptismum quoque per ecclesias illas fieri concedimus, in quibus ex more soliti estis antiquitus facere. Nulli quoque episcoporum liceat in iam dicto monasterio ordinationes facere, seu missas publicas celebrare, nisi ab abbate invitatus fue(rit), vel in ecclesiis eidem monasterio subiectis sacerdotem excommunicare, vel abbatem et monachos ad synodum suam vocare. Decime vero Sumoniensis territorii, quas ex concessione predicti (regis monas)terium vestrum per quadraginta annos tenuit, et alie concessiones, quas pro tuitione patrie, pro statu regni et pro augmento fidei Beato Martino concessit, firme vobis et (monasterio vestro) et illibate permaneant. Ad hec mitram, virgam pastoralem, anulum et alia insignia, que a quadraginta annis retro abbates monasterii vestri, qui pro tempore fuerunt, habuisse noscuntur, vobis et monasterio vestro auctoritate apostolica confirmamus. Obeunte vero te, nunc eiusdem loci abbate, vel tuorum quolibet successorum, nullus ibi qualibet subreptionis astutia seu violentia preponatur, nisi quem fratres communi consensu vel fratrum pars consilii sanioris secundum Deum et Beati Benedicti regulam providerint eligendum. Decernimus ergo, ut nulli omnino hominum liceat prefatum monasterium temere perturbare aut eius possessiones auferre vel ablatas retinere, minuere, aut quibuslibet vexationibus fatigare, set omnia integra et illibata serventur eorum, pro quorum gubernatione ac sustentatione concessa sunt, usibus omnimodis profutura, salva sedis apostolice auctoritate. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo tertiove commonita, nisi reatum suum digna satisfactione correxerit, potestatis honorisque sui dignitate careat, reamque se divino iudicio existere de perpetrata iniquitate cognoscat et a sacratissimo corpore ac sanguine Dei et Domini Redemptoris nostri Iesu Christi aliena fiat, atque in extremo examine districte ultioni subiaceat. Cunctis autem eidem loco sua iura servantibus sit pax Domini nostri Iesu Christi, quatenus et hic fructum bone actionis percipiant, et apud districtum iudicem premia eterne pacis inveniant. Amen. Amen. Amen. Demonstra michi vias tuas Domine! [Körirat]). Bene valete! [Monograma]. Ego Alexander catholice ecclesie episcopus subscripsi. Ego Bernardus Portuensis et Sancte Rufine episcopus ss. Ego Gualterius Albanensis episcopus ss. Ego Iohannes presbyter cardinalis Sanctorum Iohannis et Pauli tituli Pamachii ss. Ego Iohannes presbyter cardinalis tituli Sancte Anastasie ss. Ego Iohannes presbyter cardinalis tituli Sancti Marci ss. Ego Manfredus presbyter cardinalis tituli Sancte Cecilie ss. Ego Iacobus Sancte Marie in Cosmidin diaconus cardinalis ss. Ego Ardino diaconus cardinalis Sancti Theodori ss. Ego Hugo diaconus cardinalis Sancti Eustasii iusta templum Agrippe ss. Datum Anagnie per manum Gratiani sancte Romane ecclesie subdiaconi et notarii, XVII. Kal. Ianuarii, indictione VIIII., incarnationis dominice anno M.C.LXXV., pontificatus vero domni Alexandri pape III. anno XVII.