Alexander episcopus servus servorum dei venerabilibus fratribus episcopis et dilectis filiis abbatibus prepositis aliisque ecclesiarum prelatis et universo clero ac populo in regno Teutonico constitutis in unitate ecclesie permanentibus salutem et apostolicam benedictionem. In apostolice sedis specula disponente domino constituti ad universum corpus ecclesie ita debemus aciem nostre considerationis extendere, ut de his quos nos ipsi non possumus corporaliter visitare, per alios de quibus plenam fiduciam habeamus, curam et sollicitudinem gerere comprobemur. Inde est, quod de vobis tanquam de devotis filiis et specialibus membris ecclesie et de salute vestra paterne affectionis debito solliciti exsistentes, venerabilem fratrem nostrum E(berhardum) Salzburgensem archiepiscopum, virum utique religione scientia et honestate preclarum, legatum in regno Teutonico statuentes, cum ad presens per nos vel per aliquos a nostro latere destinatos vobis intendere non possimus, vices nostras inpresentiarum ei duximus committendas, ita quidem quod ibidem auctoritate nostra utens legationis officio, illos qui scismatis sunt pravitate polluti, revocandi ad unitatem ecclesie et devotionem nostram plenam habeat potestatem. Liceat quoque ei tanquam apostolice sedis legato vos ad suam presentiam convocare et emergentes causas discutere easque fine debito terminare. Per apostolica itaque scripta universitati vestre mandamus, quatinus ei sicut apostolice sedis legato debitam reverentiam et obedientiam inpendatis atque ab eo vocati ipsius presentiam adeatis et ea que ipse ad honorem dei et sancte Romane ecclesie duxerit statuenda, suscipiatis firmiter et servetis. Dat. Paris(iis), II cal. mart.||
B.^a)||

Source Fulltext: Salzburger Urkundenbuch, II. Band, Urkunden von 790 bis 1199. Willibald Hauthaler und Franz Martin. S. 514-515.