Wir graue Friderich von Toggenburg der alte vnd graue Fridrich von Toggenburg der junge¹ kundin allen, die disen brief ansehent oder horent lesen, ain erkantnuste der nach||gesribenon dinge vnd vnsern grůz. Wissin alle, den es ze wissinne beschult, daz wir vns reht vnd redlich vnd ane alle geuerde enzigen hain vnd enzihen an disem briefe aller || der ansprach vnd alles des rehtes, so wir habin soltin oder haben mohtin oder nach vns vnser erben dekainen weg gegen dem hohwirdigen vnserm herren kunig Albreht von Rome || vnd gegen den hohgebornen sinen sunen den herzogen von O^esterich vnd allen ir erben vmb daz gůt ze Emrach², vnd habin lassen gevarn frilich allen den schaden, den wir hatten von dem hohwirdigen vnserm herren kunig Růdolfem^a) seligem von Rome sinem vatter, vnd hat vns darumbe vnd vmb vnsern dienst der vorgenande vnsern^a) herre kunig Albreht gegeben vierhundert march gůtes silbers vnd rehter gewiht³, der wir veriehin an disem briefe, daz wir iro gewert sin vnd wir su enpfhangen haben vnd bekeret habin in vnsern êlichen nuz, vnd habin vns darumbe enzigen vnd enzihen an disem briefe aller der ansprach, alles des vszihens, aller der gewonhait vnd alles des rehtes gesribens vnd gewonliches, mit den wir oder nach vns vnser erbere^a) die vorgenanden vnsern herren kunig Albrehten oder sine sune die herzogen von O^esterich vnd alle ir erben angesprochen mohtin vmb das vorgenande gůt ze Emrach vnd vmbe den vorgenanden schaden, oder su darumbe geno^eten mohten an gaischlichem oder an weltlichem gerihte oder an dekainen steten oder mit dekainen dingen. Vnd das dis war sie vnd stete belibe, darumbe so habin wir dem vorgenanden vnserm herren dem kunige vnd sinen kinden disen brief besigelten gegeben mit vnseren insigeln ze ainem geweren vrkunde. Dirre brief wart gegeben ze Vzenah⁴, do von gottes geburte waren zwelfhundert jar nunzig jar, darnach in dem nunden jare, an der nehsten mitchun vor sant Martins tult, in dem trizehenden jare Romer stur jare.

Source Fulltext: Chartularium Sangallense IV, Nr. 2494, S. 547-548.