[20. November 1416]

[1] Die 20^a mensis Novembris fuit congregatio facultatis ad tractandum de quibusdam honorem facultatis concernentibus.

Et fuit motum primo de magistro Bentzeslao, qui se de officio iudicis iudeorum submittere vellet etc., et conclusum, quod magister Iohannes de V a lle Eni una cum decano alloqui deberent predictum magistrum et informare modis omnibus possibilibus et convenientibus, ut scilicet tale officium criminosum saltem sibi in tali statu etc. ad honorem universitatis et facultatis recusaret etc.

[2] Motum fuit etiam de controversia antiqua ex parte licentiatorum facultatis iuris etc. et conclusum, quod statim adveniente principe, qui extra terram erat, adiri deberet dominus cancellarius per totam facultatem et informari motivis eiusdem de iniuria sibi facta etc. et peti, quod dominus princeps per consilium suum in hac discordia diffinire velit, cum per universitatem finis haberi non possit. Item quod decanus scriberet ad Constantiam domino doctori magistro Iohanni de Hamelburg ipsum rogando, quod in causa facultatis sollicitus esset, scilicet consuetudines aliarum universitatum inquirendo et tandem per notarios cum solempnibus ad hoc requisitis ad formam publici instrumenti redigeret et facultati afferret, et quidquid pro istis exponeret, facultas sibi solvere esset parata.