[21. August 1453] Anno quo supra, die 21. mensis Augusti, congregata fuit facultas ad audiendum litteram regie maiestatis facultati transmissam ex parte lecture pronunc vacantis, et vacabat per obitum domini doctoris Mag. Petri Volczian. [fol. 28r]347 Eadem littera impetrata fuit per Mag. Casparum de Tetnang, antequam fuit promotus in doctorem, sed retinuit eam post recepcionem insigniorum, et sonuit littera decano et doctoribus facultatis. In qua continebatur, quod dominus Rex Ladislaus lecturam vacantem ut supra contulerit Mag. Casparo prefato et quod facultas eum ad eandem presentet et confirmet, si ad eam reperiatur vel videatur ydoneus, in simili clausula vulgari: ,das ir demselben Maister Casparen den stand derselben lectur, ob er darzu genugsam sey, inantburttet etc.

Super quo conclusum fuit, quod, ex quo essent plures doctores seniores eo et, ut videbatur, magis actuati et experti, quod non debeat recipi nec confirmari super pretacta littera, sed debeat accedi dominus Rex Ladislaus protunc existens in Perchtolczdarff et informari, quomodo precedenter per predecessores suos principes Austrie, vacante lectura in illa vel alia facultate, commissum fuit facultati, ut provideret de utiliori et magis experto etc. Quod eciam factum fuit per duos doctores et certa supposita facultatis et licet in absencia domini Zilie a ceteris prescripti domini Regis consulibus bonum obtinuissent responsum, quomodo informare velint eundem dominum Regem, ut vestigia predecessorum sequatur et quomodo racionabile sit, eligi talem per facultatem, attento quod talis magis discernere possit et sciat quam princeps et sui; redeunte tamen ipso de Zilia obtinuit prefatus Mag. Caspar aliam literam ad dominum rectorem universitatis, que sonuit, ut ipsum confirmet et conservet in lectura, non obstantibus quibuscumque, licet hoc fuerit contra totam facultatem.348