[5. Dezember 1454] Anno eodem, die 5. mensis Decembris, congregata fuit facultas medicine ad expediendum articulos subscriptos, quorum primus fuit ad cogitandum de registracione librorum facultatis et reformacione librarie. Super quo conclusum fuit, quod decanus deberet disponere fieri pavimentum in libraria superius et januam et cuilibet doctori claves, et si aliquis [fol. 32r]383 scolarium ingredi voluerit, petat clavem ab uno de doctoribus. Motum fuit eciam tunc, quod pro futuro debeat haberi unus liberarius, qui eligi debet tempore eleccionis decani, cuius officium sit omni mense semel visitare liberariam et conspicere libros et necessaria ibidem. Et fuit protunc electus Mag. Iohannes de Prauna.

Secundus articulus fuit ad terminandum negocium dudum cum appotecariis inceptum ex parte taxe et similium, ne comunitas gravetur per eosdem. Super quo conclusum fuit, quod decanus, Mag. Michael Srikch et Mag. Iohannes Kirchaim accedere deberent appotecarios vel eos vocare et ab ipsis petere taxam et referre eciam alia in decanatibus duobus precedentibus per facultatem conclusa. Quod factum fuit juxta conclusionem.

Tercius fuit ad providendum facultati de modo repellendi Iudeum perfidissimum et alios contra ordinaciones facultatis practicantes. De quo conclusum fuit, quod propter distanciam domini nostri Regis Ladislai petatur dominus officialis curie Pataviensis, ut dignetur facere publicari in cancellis, quomodo recipientes medicinas a Iudeo sint excomunicati, ymo quod facta monicione excomunicentur, quod eciam venerandus pater Mag. Iohannes Aichlperger de Novoforo, protunc officialis, perficere spopondit. Fuit secundo conclusum, quod eciam scriberetur regie maiestati, quod conservaret nos in privilegiis et statutis nostris a predecessoribus eius facultati datis. Tercio quod capitaneus patrie accederetur, ut similiter predictum Iudeum a practica, ex quo nullius esset literature, prohiberet, quod similiter factum fuit per universitatem et eciam facultatem in duobus literis, quarum tenor habetur folio sequenti.384

Quartus fuit ad concludendum de deauracione arche seu sarcofagi sanctorum Cosme et Damiani martirum. Super quo conclusum fuit, quod archa deberet ex toto deaurari ad honorem Dei omnipotentis et sanctorum prescriptorum, ad quod deberent domini doctores contribuere juxta eorum facultates, et si ab aliis eciam colligere possent, ut puta cyrurgis et appotecariis, quod eciam hoc idem attemptarent. [fol. 32v]385

Dominus rector universitatis protunc, Mag. Caspar de Tetnang, dedit 2 flor.; Mag. Martinus Guldein, protunc decanus facultatis, dedit 4 flor. Ungaricales; Mag. Michael de Srikch dedit 4 flor. Ungaricales; Mag. Pangracius Kreutzer dedit 12 sol. den.; Mag. Iohannes de Prauna dedit 1 tal. den.; Mag. Iohannes de Kirchaim; Mag. Liebhardus Swalb; Mag. Marquardus ; Mag. Thomas Mestlin; Mag. Conradus de Muldarff; Mag. Georius de Amberga; Mag. Sebaldus de Nuremberga; Mag. Stephanus Pernolt de Greding; et illi omnes protunc erant doctores medicine et simul hic Wienne.386