[26. September 1460] Item 26. die mensis Septembris, que fuit vigilia sanctorum Cosme et Damiani, fuit facultas congregata propter certas necessitates sibi incumbentes. Et fuit motum ex parte unius [fol. 48r] anniversarii habendi in die sanctorum Cosme et Damiani martirum sub officio. Fuit tunc motum a Mag. Martino Gu\elden523, domino doctore, quod quosdam haberet libros quondam Mag. Iohannis de Hamelpurck, doctoris in medicina, sibi missos, quos deberet vendere et pecuniam dare pro anniversario habendo pro anima prefati Mag. Iohannis, et si facultas vellet recipere illos et vellet in die sanctorum Cosme et Damiani martirum annuatim disponere, ut sub officio publico caneretur una missa pro defunctis cum duobus ministrantibus pro animabus eciam aliorum medicorum antecessorum et specialiter Mag. Nicolai de Herbersdorf et pro anima prefati Magistri, quod libros illos vellet dare facultati, et fuerunt novem libri scripti. (1) In primo fuerunt libri Aristotelis de animalibus et plantis et propleumata Aristotelis in uno volumine in pergameno. (2) In secundo libro fuit commentum Petri de Ebano in pergameno super propleumatibus Aristotelis in bona littera. (3) In tercio fuerunt Afforismi Damasceni, Galenus de pulsibus cum pluribus aliis in pergameno. (4) In quarto fuerunt scripta super Viatico in pergameno. (5) In quinto commentum super afforismis et pronosticis in papiro. (6) In sexto de divisione febrium et plura alia. (7) In septimo fuit breviarium Serapionis in pergameno in bona litera. (8) In octavo Avicenna de viribus cordis et plures simul in pergameno. (9) In nono fuit Viaticus Constantini in pergameno et plures alii in uno volumine. Qui libri sic fuerunt nominati coram facultate. Placuit tunc pluribus doctoribus, quod deberet fieri et sequenti die, festo sanctorum Cosme et Damiani, disponi, quod una missa pro defunctis celebraretur, et sic factum est.

Eciam fuit motum ex parte reformandorum in domo facultatis, quia incola domus libenter habuisset novam fornacem in stuba inferiori. Eciam petivit de reformacione fornacis su-perioris stube parve et fenestrarum. Placuit tunc facultati, quod acta deberent respici et in proxima congregacione tractari. Tercio fuit motum ex parte empericorum, ut Hacker Georii im Lederhoff et aliorum. Placuit tunc facultati, quod facultas primo faceret sibi fixum pedem circa dominum Imperatorem, sic quod peteretur dominus episcopus Gurczensis, ut informaret dominum Imperatorem, quod mandaret Magistro civium, quod tales repellerentur. Sequenti autem die post officium, tota facultas accessit dominum episcopum Gurczensem supplicando sibi, quatenus errorem illum ex parte empericorum devolveret ad aures imperialis celsitudinis. Qui suasit, quod deberet in cedula porrigi peticio domino Imperatori, quam vellet libenter porrigere, et sic facultas recessit. [fol. 48v]524

[1460/ 1461]