[14. März 1446] Item die 14. mensis Marcii congregata fuit facultas ad deliberandum super articulis istis: Primus ad audiendum quedam per egregium decretorum doctorem dominum Iohannem de Franchkfordia, inquilinum facultatis, referenda et ad deliberandum.213 Iste egregius vir retulit grates facultati ex parte domini graciosi domini Iohannis de Aych, episcopi pronunc Eystetensis, de locacione domus sibi ita grate et benigne et obtulit eum velle recognoscere coram facultate in comuni et pro suis suppositis in particulari. Et similiter de se ipso retulit consimiles grates, de quibus graciarum accionibus et promissionibus facultas fuit bene contenta et obtulit se prefatis patribus ad eorum beneplacita in futurum. Et tandem facultas inter cetera petivit prefatum dominum doctorem, qui fuit recessurus, ut reciperet in substitutum dominum doctorem facultatis Mag. Michaelem Gresell. Quo facto receperunt se ad partem et quidquid tentaverint, facultatis doctores nesciunt, et super istis, ut ipse dominus Iohannes reffert, recepit eum, et super hoc ego decanus recepi ab eo fideiussionem et confirmavi ad consensum alterius, ita ut per mutacionem sequentem sit substitutus et det 4 libr. den. et faciat caucionem facultati cum litera de domo, ut sit bene assecurata.

Secundus articulus fuit ad cogitandum, qualiter debita facultatis a creditoribus exigantur. De isto articulo conclusum fuit, ut ego decanus stipendium arestatum circa rectorem Mag. Heinrici Stoll exigerem a rectore, quod et feci et obtinui 7 libr. den. minus 2 den., et residuum adhuc obligatur relicta domini doctoris pie memorie. Cuius crediti summa erant 10 flor. et sic remaneret obligata adhuc 2 flor. et 2 den. ipsa relicta facultati.

Item dominus Iohannes de Franchkfordia dedit pro censu ad festum instans sancti Georgii de domo facultatis 4 lib. den.214