[2. August 1446] Quartus articulus fuit, qualiter debita facultatis a debitoribus exigantur. De quo fuit conclusum, quod decanus peteret 2 florenos obligatos per relictam Mag. Heinrici Stoll. Secundo quod Mag. Petrus Völczian et Mag. Michael de Srikch peterent debita obligata per Mag. Iohannem Paungarttner, qui obligabatur in 3 tal. den.; qui se ad persolvendum obtulit et jacuit tunc in agone, die autem sancti Stephani debitum carnis persolvit.219

Quintus articulus de anniversario peragendo ob remedium animarum omnium suppositorum facultatis. Super quo conclusum erat, quod in die sanctorum Cosme et Damiani sub officio publico cantaretur sollemniter unum officium defunctorum cum levitis, cum candelis accensis, per facultatem stipendiandis et mutuandis, quousque de propriis sibi provideat, et quod die precedenti de sero similiter decantentur vigilie mortuorum cum cereis, ut moris est.

Sextus articulus fuit ad audiendum proponi quedam alia honorem facultatis concernencia et ad deliberandum super eisdem. Circa istum articulum motum fuit de bedello proprio ordinando pro facultate220, similiter de virga comparanda ob honorem universitatis et specialiter facultatis medicine. Et fuit conclusum concorditer, quod deberet recipi unus, si saltem vellet contentari in stipendio dato precedenti bedello juristarum; visa tamen sua diligencia, facultas illud pro futuro posset augere. Similiter fuit conclusum de virga, quod ante mutacionem futuram deberet comparari, et non fuit hoc explicatum publice in cedula propter certa motiva dominorum doctorum. Fuit eciam tunc motum de collecta danda bedello per dominos doctores et supposita, sed nichil fuit de hoc conclusum, sed reservabatur ad congregacionem proximam.221

Item comparavi virgam pro facultate, que in pondere habuit duas marcas argenti, quatuor lotones et 1 quint. Dedi 5 ducatos pro deauracione. Item dedi aurifabro pro labore 5 flor. Ungaricales et 2 gross. famulis pro bibalibus. Item unam marcam argenti comparavi pro 6 flor. 1 ort.