[20. Juli 1513] Item feria quarta fuit iterum congregata facultas post Alexii ad deliberandum, quid expediat fieri ex parte structure domus, maxime tecti, ne domus ruinam paciatur.353Ad hoc fuerunt vota doctorum, qui protunc fuerunt in congregatione: Primo doctoris Wilhelmi, qui persuasit a me mutuum, ita quod per huiusmodi mutuum non deberem aggravari voluitque, quod fieret stuba cum tabulis ligneis. 354

Secundo doctoris Preiss, quod structura, per quam magis domus ruinam posset pati, expediatur, puta tectum.

Tertio doctoris Tansteter, qui commisit ordinatis ad structuram, videlicet decano protunc, ut doctori Ioanni Neuman, doctori Ioanni Cuspiniano et doctori Wilhelmo, qui protunc ad structuram ordinati fuerunt, ita quod isti meliori modo singula provideant; non voluit me doctorem Newman, ut inquilinum, ligatum ad mutuum. Item idem Tansteter dixit, quod non omnino compleatur ista structura, sed pro posteris etiam mittatur, et fuit sententia etiam doctoris Wilhelmi, quod pro posteris etiam aliquid fiat.

Quarto doctoris Symonis Latz, qui commisit etiam dominis ordinatis, et placuit sibi, quod fiat stuba cum tabulis ligneis et fiat predispositio aliqua ad hoc, et si inquilinus posset sine iactura sua accomodare, quod faceret. Exhibuit se super hiis votis decanus doctor Ioannes Newman, protunc domus inquilinus, quia velit anticipare cum censu per duos annos, qui census duorum annorum extendebat se protunc ad 26 flor. Ren. Illis expositis tandem, si necessarium fuerit, et obtinuerit ex vinis suis vel qualitercumque, ut ex practica, aliquam peccuniam, quod iuxta suam honestatem ulterius contribuere velit. Placuit omnibus et presertim doctori Wilhelmo, qui dicebat cum aliis: Satis est; — sed quid in absentia mea, cum eram extra civitatem in practica cum quodam magnifico Comite in Ungaria, eundem doctorem Wilhelmum ut vicedecanum moverit, nescio, quod ultra prius conclusa alia tractavit. [fol. 57r]