[29. Dezember 1539] 29. Decembris iterum habita est congregatio doctorum ad novam commissionem dominorum de regimine, quod facultas medica non exspectet indicia morbi pestilentialis, sed sine dilatione consultet cum de remediis preservativis tum curativis prefati morbi. Deliberavit itaque facultas, quod remedia curativa non possent describi exacte iuxta canones medicinales, cum adhuc non constarent cause morbi, an ex contagione vel ex malorum fumorum ex terra evaporantium vel ex influxu celesti aut ex his omnibus aer ipse corrumperetur.

Pro preservativo tamen generali dedit facultas talem instructionem, ut domus et platee servarentur munde et754fierent suffumigationes cum herbis, floribus et lignis odoriferis et in publicis plateis sepe magni ignes cum lignis bonis et odoriferis fierent. His enim maxime iuxta doctrinam Hippocratis purgaretur aer et preservaretur ab infectione; et ut etiam apothece visitarentur, an essent provisi illis medicinis, que contra illum morbum utiles essent. Cum vero cause morbi predicti magis innotescerent, velit facultas edere libellum tum pro divitibus tum pro pauperibus, quid ante et post infectionem deserviat. Harum autem rerum copias de verbo ad verbum habes in eo fasciculo755, cui titulus “Copie actorum in decanatu D. Perlachii”.756