[14. August 1554] Secunda congregatio est celebrata die 14. Augusti. In hac literas testimoniales gradus doctoratus ostendit facultati D.Ladislaus Stuff petiitque pro admissione ad facultatem, item puncta, respondentem aliquem; in numerando pecuniae [fol. 178r]confidebat, uti supplex libellus prae se ferebat, dominos doctores de facultate aequiores fore benignioresque. Effectum autem est nihil, sed facultas statuit, ut D. Ladislaus pecuniam, sicuti moris est, exponeret921eandemque apud decanum deponeret, et sic quemvis dominorum doctorum pro sua persona benigniorem posse fieri.922

In eadem congregatione Carolus Minster coactus per magistrum civium comparuit. Is exhibuit facultati quoddam “fidimus", ut vocant, suarum testimonialium literarum. Reviso “fidimus" concluditur, quod stilus exhibiti “fidimus" non sit stilus facultatis; imo facultas credit literas suorum privilegiorum esse surrepticias. Ea de causa voluit facultas, ut clarissimus dominus doctor Cornax ageret cum Regiae Maiestatis etc. cancellario, universitatis conservatore amplissimo. “Fidimus" cupiebant domini doctores, ut reservaretur apud facultatem. In eadem [congregatione]quidam balneator Mathaeus Fux est examinatus et admissus. Dedit facultati 1 flor. 6 sol.

In hac congregatione habita exposui pro vino malvatico et communi, pro crustulis, peponibus et pyris 5 sol. 26 den.