[23. Februar 1504] Ad audiendum istam conclusionem iterum feria sexta ante Invocavit facultatem medicam congregavi. Audita itaque conclusione Consistorii, in hunc modum facultas concorditer deliberavit: Ex quo facultas [fol. 32v] medica semper intellexerit, duas facultates ad hoc esse, quod nil contribuere velint, videlicet theoloycam et artistarum, nisi cives prius salutentur, pariter facultas medica contribuere noluit; cum vero dicte facultates qualitercumque mutate seclusa ista via contribuere vellent, ipsa facultas, etiam nihil in thesauro habens215, aliquid contribuere velit. Sex itaque libras den. in quodam panniculo clausas et signatas signeto decani tota facultas unanimiter et concorditer rectori vigore etiam pretacte conclusionis per Consistorium facte contribuendo presentavit cum quibusdam protestacionibus, quas decanus de verbo ad verbum in presencia notarii universitatis et domini rectoris et tocius facultatis legit. Rector vero noluit istam protestacionem a facultate recipere neque peccuniam, cum ab aliis facultatibus nil percepisset, sed promisit facultatem habere indemnem in Consistorio, quia considerasset benevolenciam nostram velle contribuere cum protestacione, et quod istam peccuniam cum protestacione in proximo Consistorio facultas presentaret dixit.

Item in ista congregacione facultatis exposui pro vino et aliis 18 den.