[27. August 1565] 27. Augusti cum doctores facultatis convenissent, ut istum supradictum Matheum examinarent, intellexerunt, circumforaneum illum impostorem, de quo superius facta est mentio, non solum non esse incarceratum aut ablegatum, verum etiam majorem habere vulgi concursum quam unquam ante. Tunc enim etiam scripto publice evulgaverat, quantum in hac parte praestare posset. [fol. 57r]

Cum autem omnia ista contra nostra privilegia et immunitates fieri viderent d. doctores et senatum etiam monitum et qui ista amplius ferenda non esse nunciaverat decano, ad ista in contumeliam nostrae facultatis connivere, noluerunt in illorum, qui tam aperte facultati illuderent gratiam chirurgum illum examinare. Imo concluserunt unanimi consensu, quod posthac nec in hujusmodi examinibus nec alias in visitationibus hospitalium, cura pauperum et aliis, quae ingruere solent ulla in re velint gratificari Viennensibus. Illis liberum esse, ad hujusmodi officia vocare hujusmodi impostores. Doctores ea privilegia, quae nullus defendat nihil curare.

Haec etiam per informationem decreto facultatis, quae etiam per omnes postea approbata fuit, senatui indicata fuerunt.

Exposui in ista congregatione 1 sol. 8 num. Pro describendis duabus informationibus, de quibus superius facta est mentio, quartale daleri, sunt 17 cruc.