[27. Februar 1568] XXVII. Februarii convenit me D. Martinus Mylius ordinarius urbis Iglaviensis medicus conquerens, se a quodam empirico ejus civitatis premi ac in praxi exercenda impediri. Cum autem senioribus facultatis probe constaret, ipsum ante quinquennium peste grassante et senatu Iglaviensi multum rogante, facultatis nomine hanc functionem certis conditionibus suscepisse (inter quas et haec fuit ne senatus [fol. 81v] empiricos foveret) rogavit obnixe facultatem, quo scripto aliquo facultatis nomine exarato admoneret, ut promissi ac conditionum memor hunc et similes empiricos amovere velit.

Haec eodem die dnis de facultate scripto significavi, qui subscriptis sententiis suis decreverunt D. D. Myllum scripto aliquo nomine facultatis exarato esse commendandum senatui Iglaviensi et significandum eidem, nisi prohibeant empiricos, facultatem posthac si opus aliquando foret, non esse promoturam doctores ad ipsos et quid periculi ab empiricis sit, quoque indicandum. Id quod a me factum est.