[24. Juli 1568] Wir von der Röm. Khay. Mt. unnserm allergenedigisten herrn zu nachvolgender Sachen verordnete Commissari: Ich Steffan Schwarz der Rechten Doctor unnd höchstgedachter Khay. Mt. hoffrath, unnd ich Sigmundt [fol. 86v] von Ödt auch der Rechten Doctor unnd mehr höchstgedachter Khay. Mt. Regimentsrath der Nider Osterreichischen Lannde, bekhennen hiemit offentlich. Nachdem höchstgedachter Röm. Khay. Mt. fürkhommen, das zwischen der löblichen Facultet Medicorum unnd herrn Doctor Ladislao Stuff zwitracht, widerwillen unnd unainigkhait sich erhebt unnd zutragen haben solle, an wolichen ir khay. Mt. ain ungenedigs missfallen tragen, unnd alss ain guettiger senfftmuettiger unnd gerechter Khayser löblicher geacht, das zwischen der Faultet unnd den Glidern Fridt, Ruehe unnd Ainigkait dan widerwillen sein solle. Das Ir khay. Mt. unnss derhalben zu Commissarien verordnet miit genedigen bevelch, das wir beede obgemelte Partheyen fur unnss erfordern, notturfftiglichen verheren und alssdan verainen, Unnd in ainen gleichen verstandt bringen sollen. Sölchem khayserlichem bevelch wir gehorsamist nachkommen und beede thail fur unns erfordert, aller Notturfft nach verhert und volgennts mit Irem guettem vorwissen auf nachvolgennde Mainung ganzlichen miteinander verainet und verglichen.

Erstlichen soll aller widerwillen und Injuri, so sich von beeden thailen zuegetragen, auch die Action und Reconvention, so bey herrn Rector als erster Instantz ordentlichen Oberkait furkomen, desgleichen auch die Exclusion, in welcher Doctor Ladislaus von der Facultet excludirt worden, nun hinfüren gennzlichen aufgehebt, todt und absein und solche verloffne handtlung kain Thail gegen dem andern nit mehr äfern noch in unguetten gedenckhen.

Zu dem andern solle Doctor Ladislaus dem Decano unnd Medicae Faultati alss derselben Mittgliedt alle gepurliche Reverenz und gehorsam laisten und erzaigen. Woferr er aber hinfüran ungehorsamb wolt sein, soll er gepürliche Straff darumben laiden, auch zu bestenndiger enntlicher vergleichung und würklicher recognostierung aller schuldigen und gebürlichen gehorsam, damit D. Ladisaus Stuff [fol. 87r] Facultati Medicae als ain Mittglied verobligiert und verpunden, So sol er dem Decano Facultatis Medicae oder an yezo Vicedecano anstatt mehr gemelter gannzen Facultet ain fraindtlichs, christlichs doch an seinen Eeren und herrrgeprachten guetten Demuet genzlich unverlezlichs Abpitten thuen, ungeferlich mit disen wordten zu sprechen, wo er aufs unverstanndt und unbedächtlich gemelte facultet offendiert habe, das Sy Ime dasselbig alss pia Mater dieweil sein gemueth und Mainung nie gewesen, das er wider sy fürseczlich wass hanndlen welte, christlich und gonstigleichen verzeichen.

Er D. Ladislaus solle auch an yezo ainem yedenn Doctor seinen Mittgliedern unnd Ir yeder Ime hinnwiderumben zu ainem warzaichen befreundiger verainigung die hanndt bietten. Darmit gegen sollen Sy auch Doctrori Ladislao hinfuran allen freundtlichen alss Mittglider miteinander leben. Es solle auch yeczgemelter Doctor Ladislaus hinfüran in allen versamblungen Facultatis und andern Actibus publicis sowol auch in Concurenciis alss ain Mittglidt wie zuvor zuegelassen sein.

Zu dem Dritten sollen die Acta in Decanatu Doctoris Ladislai, wie dieselben durch die Facultet inn Ihr Prothocol eingeschriben, Also beleiben unnd durch Doctorn Ladislaum ratificiert und unnderschriben werden. Diesen Vertrag steet und fest zu zu hatlen, haben unnss beede Thaill inn beysein irer Beystänndt angelübdt und versprochen.

Des zu urkhund haben wir zween gleichlauttendt vertragsbrieff, so mit des herrn Decani und D. Ladislai hanndtgeschrifft underschriben unnd mit unnsern Insigl verferttigt aufgericht und yeden tail ainen zugestelt. Solcher Vertrag solle auch in der Facultet Prothocol eingeschriben werden.

Actum Wienn den vierundzwainzigisten Julii Anno im acht und sechzigisten.

Andreas Dadius Ladislaus Stuff.

p. t. decanus Phil. et Med. Dr.262