[10. November 1569] Inclyta facultas medica ad decretum magnifici domini rectoris congregata revisis et diligenter perpensis omnibus tum generalibus totius academiae, tum particularibus facultatum statutis deprehendit, baccalaureum theologiae nec eligi in decanum, nec ad facultatem theologicam aut consilia universitatis admitti, multo minus caeteris doctoribus et magistris in consistorio et rotula proponi et praefici posse. Quare si praesens Gregorius Lamberti, theologiae recens formatus baccalaureus in decanum supremae facultatis eligatur atque in consistorium collocetur, protestatur solemniter dicta facultas medica, hoc illegitime, contraque omnia vetustissima statuta et exempla hujus academiae primum fieri. Ideoque protestationem hanc protocollo universitatis ad verbum inseri reverenter petit, ut si postea ex hac scintilla aliud oriatur incendium, haec nostra facultas omni culpa vacare et statutorum bene memor fuisse intelligatur.

Actum die 10. Novembris anno 1569.

Hanc itaque protestationem domini doctores memoriae causa huc adscribi jusserunt. Copia ejus una cum pluribus ejus argumenti articulis in fasciculo actorum lit. C. habetur. [fol. 138v]

Petiit etiam consistorium in facultatibus deliberari de quodam articulo privilegiorum universitatis. Nam propter vina conquesti sunt cives apud caesaream majestatem de doctoribus, magistris et omnibus membris universitatis, quod ultra vinearum suarum fructus etiam empticia vina conentur in urbem invehere.317

Consuluerunt domini doctores, ut consistorio offerretur decretum Maximiliani primi in antiquo libro actorum inventum, item inspiceretur scriptum volumen D. Ederi contra Viennenses, ubi ejusmodi privilegia antiqua collecta sunt, simulque quaeratur decretum318 sub rectoratu D. Schäffleri a Caesare Ferdinando editum.

Dicatur etiam de difficultate consulis in admissione vinorum. Haec omnia in consistorio per decanum dicta sunt.