[3. Februar 1570] Die 3. Februarii XVII congregatio. Comparuit coram facultate quidam empiricus345 Jacob Khürbiss von Strassburg, qui petiit examinari in affectibus oculorum videlicet suffusionibus et inflammationibus. Examinatores erant D. Dadius, D. Paulus, D. Waltherus et D. Lingelius. Examinatus igitur et admissus est ea conditione, ut in hac urbe non aggrederetur aliquam curam oculorum absque consilio doctoris et caetera omnia praestaret, quae in juramento illi sunt proposita.

Praestitit igitur juramentum, solvit facultati 3 flor., pedello 20 cruc. dedique illi testimonium in forma consueta. Sed postea deprehendimus, ipsum juramenti articulos non servasse.

Deinde de privilegiis nostris a senatu Viennensi proxima apothecariorum incarceratione violatis decrevit tota facultas, concipiendum esse scriptum ad excelsum regimen, quo illi tota causa significetur et petatur, ut privilegium nostrum in executionem sua authoritate deducant et reliquis quatuor senioribus apothecariis injungant, ut et illi juramentum facultati praestent. In hanc sententiam scriptum ad regimen componere jussus sum.346 [fol. 149v]