[14. Juni 1676] V. congregatio 14. Junii. Supplicarunt pro sessione D. Matthias Ungar et D. Michael Constantinus Buswe quorum primus Viennae praeterito anno alter ante aliquot annos in Italia gradum accepit apud nos autem non ita pridem repetiit. Uterque admissus est.

Propositus fuit iterum libellus supplex D. Sorbaith quo sibi tanquam superintendenti fundationis Geislerianae 400 flor. reddi petiit. Responsum accepit quod si per

literas fundationis docuerit mentem testatoris fuisse pecuniam hanc in custodia superintendentis non autem decanorum asservari debere facultas contra mentem testatoris nihil sit factura.

Super acta D. Christiani Rechperger iterum deliberatum an facultas isdem acquiescere possit eo quod in actis istis summa annuarum expensarum quidem inserta acceptorum vero pro singulis annis nulla mentio facta fuerit quae cum prohabilissime summam expensarum multis modis superent haeredes praefati doctoris ad restituendum illius quod excedit utique teneri. Conclusit autem major pars ad evitandam litis movendae actionem tentandam esse dom. viduam et haeredes ut sub praetextu memoriae apud facultatem erigendae munus aliquot quasi sponte offerant quod etiam apud filium ejusdem insinuavi verum cum nulo effectu. Proposita etiam fuit occasio qua facultatis pecunia pro annuo censu apud dom. Kirchstetter pie defuncti haeredes exponi posset qui pro accepta mutuo pecunia omnem assecurationem etiam obtulerunt. Consensum sed additum ut oblata assecuratio prius bene examinetur et quia non satis secura visa fuit, etiam anticipatio ista fuit intermissa.