[28. November 1613] XXVIII. Novembris feci congregationem in qua primum admonitus a magnifico domino rectore et venerabili consistorio proposui inclytae facultati quemnam seniorem qui interim in absentia D. D. Magni caesaris archiatri vices suas in consistorio obiret velit nominare et constituere. Conclusum est officium senioris absentis subseniorem hujusque absentis loco eum qui sequitur in facultate ratione senii ne quid in praejudicium fiat in consistorio. Si ita necessitas postularet semper gerere debere. Itaque pro tempore consistorialis loco senioris absentis denominatus et constitutus est D. D. Perchover facultatis subsenior quem monere jussus sum ut consistoriis pro emolumento et commodo facultatis nostrae interesse velit. Admonitus fuit. Proposui deinde libellum supplicem B. Petri Schurer pharmacopoei cum literis additis disciplinae. Et quia literas natalitias nondum in promtu haberet promisit per cautionem se brevi eas allaturum. Literae disciplinae sufficientes sunt judicatae et cautio tum per D. D. Rechperger in scripto C. tum per dominum Weining in senatu civili apud Viennenses suae majestatis vicem gerentem oretenus data fuit recepta unde admissus fuit ad examen.

Examinatores autem noviter per vota electi fuerunt D. D. Dominicus Pisellus et Piribachius ex pharmacopoeis vero Joannes Reutter et Joannes Häringshauser. Examinatus est autem 6. die Decembris. Respondit mediocriter sed latine admissus est et approbatus. Confecit electuarium benedictum laxativum, pilulas cochias, syrupum de tribus, emplastrum diachilum cura gummis. Solvit 5 flor. pedello suam partem. [fol. 58v]

Tertio proposui in eadem habita congregatione an facultas velit consentire quod pyretum cum nullum adsit pro honore facultatis gestandum ex aere facultatis conficeretur. Annuit inclyta facultas et novum ex holoserico confectum fuit. Exposui 9 flor.