[26. Oktober 1619] Secundo traditum est mihi decretum A. a serenissimo Leopoldo archiduce XXVI. Octobris quo mandatum fuit facultati ut duo doctores medici constituerentur qui in hospitali castrensi ultra pontes aegros quorum pulvere tormentario plurimi a se ipsis accenso ambusti erant plurimique ab haereticis rebellibus Boemis ipsorumque complicibus quorum numerus ut rumor erat ad septuaginta millia se extendebat sauciati cum exercitu caesareo qui triginta quasi millium fuit huc absque aliqua nostrorum insigni strage confluxerant in dies visitarent.

81

Fol. 93v ist leer.

Conclusit facultas ut singuli domini doctores facultatis per ordinem a junioribus incipiendo id peragerent quod et factum est quantum fieri a singulis potuit diligenter. Statuit insuper circa hoc negotium facultas ut serenissimo archiduci denominarentur aulici medici et peteretur ob causas in supplici libelo B. assignatas hoc munus ipsis demandari. Factus igitur est libellus supplex et a facultate revisus traditusque domino secretario Grapler quo viso monuit ut re cum antiquioribus dominis collegis melius deliberata id a serenissimo non peteret facultas futurum inde putans ut hoc argumento si quidpiam posthac petituri essent a summo magistratu medici aulici et haeretici facile illud impetrarent etsi id cessurum esset in praejudicium facultatis. Re igitur quibusdam ex senioribus colegi medicis communicata et sumpto ab ipsis consilio libelum illum amplius non ursi sed suasu ipsorum vigore decreti archiducalis mandavi per pedellum medicis aulicis et haereticis ut una nobiscum praedictos aegros visitarent. Respuerunt mandatum omnes praeter unicum Pirtimpfelium qui suam in hoc munere operam pollicebatur factum minime cogitans. Duo autem Judex et Peverelus insolentissime ad jussa principis et facultatis responderunt sicque factum ab omnibus extra facultatem medicis in hoc pio opere est nihil.