[11. Februar 1621] III. congregatio ad 11. Februarii ut M. instituta in qua proposui haec: Primo empiricos qui ilicite hic medicinam faciunt facultati denominavi Blasium Berasium Italum, Joannem Steinmetz qui doctoris medici titulo gloriatur et quendam pharmacopolam qui ex Mistelbach huc commigravit. Conclusum empiricos convocandos post octiduum ad plenam congregationem ibique ut abstineant ab illicita praxi severe commonendos quod et factum est. Secundo proposui cum in nupera congregatione conclusum sit privilegium D. Judicis reservandum donec privilegia sint ab imperatore confirmata hoc vero negotium diu protrahatur illeque suum privilegium instanter repetebat quid faciendum sit facultas decernat. Conclusum transsumptum per notarium universitatis desumendum a privilegio idque deinceps D. Judici restituendum quod et factum est ut N.

Tertio cum superintendentia primaria Emericanae fundationis morte D. Pirpachii vacet quis ei subrogandus in hoc officio. Electus est in primarium D. Rechperger, in secundarium D. Gollerey.

Quarto ratione scripti imperatori tradendi illud concipiendum per decanum ita ut contineat informationem nostrorum privilegiorum simulque petitionem confirmationis eorundem idque facultati pro correctione revidendum exhiberi debere post 8 dies. Quinto supplici libello petiit admitti ad repetitionem D. D. Joannes Guilielmus Mannagetta. De cujus privilegii sufficientia cum dubitaret facultas significandum ei duxit ubi a caesarea majestate et nuntio apostolico supplementum habuerit idque

facultati exhibuerit ab eadem benignum habiturum responsum.