[22. Jänner 1607] XXII. Januarii 1607 in congregatione lecta sunt et approbata

acta magnifici domini rectoris, pro tunc exdecani et antecessoris mei.

Quidam chymicus nomine Leonardus a Krichenbach exhibuit quendam pulverem,

quem bezoardicum nominabat, una cum schedis typo excusis de viribus et

proprietatibus ejusdem pulveris supplici libello annexis, petens, quod inclyta

facultas de eo tentamen super brutum vel maleficam personam facere juberet,

exinde daretur ei approbatio, quod totum ei denegatum est. [fol. 15v]

D. D. Joannes Bittner munus superintendentiae stipendiorum per scriptum

resignavit. In ejus locum suffectus est clariss. ac excellentiss. dominus D.

Guilhelmus Rechperger.

Bartholomaeus Schmidler xenodochii civilis tunc temporis chirurgus et balnei ad

coeli portas curam suscepturus, petiit sui testimonii ratificationem, ne videlicet

ulteriori examini subjiceretur, cum octennio ab hinc jam examinatus fuisset, quod

ei facultas benigne concessit eorumque tribuno cum altero balneatore vocato id

denunciatum.

Leonardus Näser balneator ab inclyta facultate supplex examen consuetum petit, a

senatu Viennensi et superintendentibus xenodochi civilis in chirurgum ordinarium ab

iis ad id designatus, si idoneus repertus fuerit, literis tum nativitatis cum disciplinae

instructus legere et scribere gnarus, fuit admissus et praesentatus a duobus

magistris balneatoribus, Caspare in Schelchbadt et magistro Leonardo in der

Wollseyll, examinatus 16. mensis Martii [fol. 16r] ab excellentiss. et clariss. D. D.

Paulo Perkoffero, Martino Cuttigio, Guilhelmo Rechberger et Sigismundo Gaysler,

quos ordo tangebat. Respondit mediocriter, solvit consuetum, confecit emplastrum

grisaeum et unguentum aegyptiacum.

Bartholomaeus Waldman pharmacopoeus ad leonem aureum in foro piscario petiit

visitari theriacae dispensationem, quam vocabat communem, cujus receptam

exhibuit. Ei fuit concessa et 23. mensis Martii mecum praesentibus clariss. D. D.

Martine Cuttigio et Conrado Colmanno, officinarum ordinaris visitatoribus et

examinatoribus confecta.

Joannes Heringshauser pharmacopoeus ad griphum aureum petit licentiam

aperiendi et divendendi theriacam et Mithridatium jam ab anno confectum, singulis

mensibus agitatum. Ei concessum est.

Clariss. vir D. D. Colmannus petit a magnifico domino rectore in gratiam Christophori

Crants herniarum sectoris testimonium peritiae et industriae ejus. A praefato domino

magnifico rectore remissus est ad facultatem, quae censuit, sufficere testimonium

praefati D. D. Colmanni, nec consentaneum esse, quod habeat a facultate. [fol. 16v]

Magister Daniel Henricus chirurgus barbitonsor supplex petiit examen consuetum,

habens proprium et destinatum locum, videlicet officinam tonsoriam in vico Wilpingher

dicto. Annuit facultas, praesentatus est a duobus magistris civibus barbitonsoribus,

magistro Guilhelmo Raigher et magistro Christophoro Hungher.

Cum vero literis tam nativitatis quam disciplinae, prout tunc instructus non esset,

facultas benigno cum eo (more hactenus non inusitato) dispensavit dante duos

sponsores, eosdem praefatos magistros barbitonsores cum termino 6 mensium.