[9. Jänner 1608] Die 9. Januarii anni 1608 transmisi dominis doctoribus supplicem libellum una cum literis disciplinae et legitimae nativitatis Joannis Sing balneatoris officium interea subeuntis in Mödling, quo petebat [fol. 20v] ad examen consuetum admitti. Consensit facultas ubi prius literas commendatitias et intercessorias a senatu Mödlingensi sigillatim ad facultatem scriptas, uti antehac semper fieri consueverat, adferret. Attulit easdem 17. Januarii, simulque praesentatus a quatuor balneatoribus magistris examinatus fuit eodem die ante prandium (discessum enim ob patientes quosdam domi relictos maturabat et a prandio praefatio domini Mag. Abrahami Bart physicae professoris id impediebat) ab iis quos ordo tangebat, nimirum a D. D. Perchovero, D. D. Martino Cutigio, D. D. Joanne Bitnero extraordinarie accedente, D. D. Tobia Piribachio et D. D. Sigismundo Geisler.

Respondit utcumque tenuiter, hinc cum increpatione et adhortatione ad diligentiorem operam sedulamque chirurgicorum librorum loctionem approbatus, sicque ipsius praesentatoribus dictum fuit, in posterum peritioros in arte praesentarent, ni repulsam eos pati vellent. Confecit sequenti die apud me emplastrum oxicroceum et unguentum aegyptiacum, dedi illi testimonium consuetum, pro quo solvit facultati 3 flor., pedello suum.