[27. April 1634] II. congregatio 27. Aprilis. Mag. Bartholomaei Egkenhagen supplicatio fuit audita qua denuo promotorem sibi ex officio assignari negavit. Conclusit facultas ipsi respondendum esse: Tametsi candidatus ipsemet sibi promotorem ex gremio facultatis exorare deberet attamen ubi supplicans pecuniam ad actum publicum necessariam decano et facultati exhibuerit assignandum illi promotorem qui citra dilationem conferat illi doctoratum. Lecta fuit concepta per commissarios reformationis norma quae approbata rectori

et consistorio ad ulteriorem considerationem et approbationem exhibita fuit ubi

pariter in consilio publico cum juristarum reformatione fuit confirmata atque ad

deputatos a sacra caesarea majestate commissarios una cum aliis ad hoc

negotium pertinentibus transmissa.

Quinque phil. mag. et med. stud sub decanatu D. Juncker ad disputationem pro

baccalaureatu admissi ad examen admitti petierunt. Conclusum omnes quinque

uno die examinandos et expediendos esse.

Daniel Decker ex caesareo privilegio chirurgicam hic coeperat exercere; qui

postquam demortui Engelhardi tonstrinam emisset examinari petiit. Admissus est.

Mathias Ceski de Sancta Cruce nobilitatem equestrem prae se ferens homo tamen

pauper et inopia sustentationis ad imposturam redactus insipidum quoddam oleum

gratia Dei dictum a Deo et beata virgine sibi sub secreti silentio nulli alteri

reperiendo revelatum contra omnes omnino corporis morbos velut panaceam

ostiatim dilaudare atque sub excelsi regiminis privilegio publicis valvis affixo per

studiosos tamen meo jussu saepius detracto publice venum proponere coepit. Et

ut plures alliceret novi remedii emptores tractatum quendam italicum conscripsit

cujus imprimendi licentiam sibi ab excelso regimine concedi petiit. Tractatus ad

facultatem pro censura transmissus cum [fol. 157v] non tantum plurima mendacia

sed etiam absurdas haereses contineret rejectus est. Effecit tamen importunus

impostor ut rejecto totius facultatis judicio excelsum regimen ad ipsius

denominationem censuram duobus nominatim doctoribus de gremio facultatis ad

hoc inductis denuo committeret qui non tantum fatuum hominis scriptum

approbarunt sed etiam contra statuta facultatis et juramentum authorem uti suis

medicamentis probe notum commendarunt. Horum censura factum est ut regimen

in praejudicium totius universitatis in tractatus impressionem consentiret quam

tamen ob impedimenta variis modis per me interposita in effectum necdum

deduxit.

Quidam herniarum sector civis Frisingensis non tamen circumforaneus per Suecos

omnibus bonis spoliatus et exul factus hic Viennae artis exercitio se honeste

sustentare cupiebat. Ne vero privilegio caesareo destitutus ab aliis agyrtis

impediretur petiit ut facultas testimonium amissum renovaret.

Cum acta illum fuisse examinatum testarentur placuit misero exuli subvenire qui

tamen hactenus nihil amplius ursit

Georgius Traub Suevus cum quodam Georgio Horsiczky Polono per D. Olitorium

facultati commendato pro stipendio Emericano supplicavit. Cum Traub in studio

senior atque diligentior esset facultas illi stipendium concessit.

Adamus Competer exiguae eruditionis carmine publicis typis impresso titulum

licentiati in medicina sibi adscribere ausus videbatur de crimine falsi puniendus.

Cum facultatis mulctae se submittere nollet stipendio quod ex proventibus bursae

gentium habebat a me superintendente privatus est.

Extra congregationem acta: Albertus Fendl balneator nosocomii civilis chirurgus

sub decanatu D. Jeskii pro admissione supplicans obtinuit examen tamen huc

usque dilatum. Examinatus est 30. Maii. [fol. 158r]