[24. November 1691] Die 24. Novembris transmissum fuit a regimine decretum, quod continebat, ut citaretur Danese Tabarino, siquidem ex sumptione electuarii sui alexipharmaci quidam in suburbio nomine Gallipin ultra trigesies purgatus et jam desuper mortuus fuerit, uxor autem illius ab usu ejusdem etiam et quidem ultra centies purgata et tunc in extremis vitae haereret adeoque seria fiat inquisitio, quatenam ipse Tabarino hominibus venundaret electuarium, ut inde tam funesti sequantur eventus et ipsa rei inventa qualitas sequenti die consilio sanitatis notificaretur. Tabarino citatus respondebat, se penitus ignarum esse quibus vel quam ob causam tam male cessissent et nocuissent sua medicamenta usurpata, narravitque plura simplicia et radices, quae compositionem sui electuarii ingrederentur, quae utique singula bona et alexipharmaca erant. Hinc arguebatur illud infaustum accidens occasione alterius causae evenisse et jam in corporibus illis malignum fomitem et materiam delituisse. Idipsum dein altero die consilio sanitatis significatum fuit.

Notandum, quod post medium Octobris a me inchoatae fuerint visitationes pharmacopoliorum. Materialistarum officinae quoque peragratae fuere et repertae sunt eorum merces et materialia pharmaceuticen concementia bene constituta. Admoniti fuerunt, ut sibi bonas merces imposterum comparare studeant, caveantque oculos cancri ex alba argilla formatos, uti tunc a fraudulentis hominibus [fol. 94r] variis officinis illati fuerant, mercari et haud quaquam divendere atque se intra limites mercaturae suae contineant neque praeparata et compositiones quae pharmacopoeis debentur, in officinis suis hominibus venundent.